KUCHING: Penyikap perengka guna mensia mayuh di Terminal Bas Kuching Sentral deka dikemesaika agi dikena nangkup peminta guna setipak enggau pemayuh mensia.
Chairman Lembaga Pengarah Permodalan Assar Sdn Bhd, Tan Sri Datuk Amar Bujang Mohd Nor madah, pekara nya udah dikerandauka enggau piak ti bekaul dikena ngenukuka perambu nya nyadi nyata.
“Senipak enggau pemansang di Kuching Sentral diatu, kami (Permodalan Assar Sdn Bhd) udah merambu deka ngemesaika agi perengka guna mensia mayuh ti udah bisi dikena napi peminta guna mensia jemai ila.
“Kami udah ngatur aum enggau piak Opis Menteri Ngetan Menua bekaul enggau perambu kami ti deka ngambi tauka ngena tanah sida ti berimbai tauka sepiak Kuching Sentral ulih dikemansang kena ngemasaika perengka guna ti udah bisi diatu.
“Nyema perambu nya nerima timbal ti manah ari Opis Menteri nya, kami ngarapka piak perintah nengeri nyukung ngambika perambu nya ulih dipejalaika enggau jampat,” ku iya.
Bujang mansutka pekara tu dalam jaku pengelalau ba pengerami bejadika Terminal Bas Bersepadu Wilayah, Kuching Sentral ti diatur Permodalan Assar Sdn Bhd di Kuching Sentral ditu ensanus.
Terminal Bas Kuching Sentral nya kemari dipenyadika Kepala Menteri Pehin Sri Abdul Taib Mahmud seraya disempulang bini iya Puan Sri Abdul Taib Mahmud.
Kelimpah ari nya Bujang madahka konsep terminal Kuching Sentral diperambu deka dikerembaika di mengeri bukai di Sarawak.
“Konsep nya ukai semina nguntungka pengemeran bas enggau orang mayuh tang nyengkaum ngangkatka tikas sosio ekonomi raban bansa.
“Beduduk ari pekara nya kami ngarapka perintah nengeri meri mandat ngagai ASSAR enggau eksklusif ngaga enggau nyaga terminal bas baka Kuching Sentral di kandang mengeri bukai di Sarawak,” ku Bujang.
Terminal Bas Kuching Sentral sebengkah projek ti dikemansangka Permodalan ASSAR Sdn Bhd sereta digaga ba tanah 7 ekar pemesai, ti begunaka belanja urung RM90 juta.
Projek nya brengkah digaga taun 2010 sereta tembu ba bulan Mac 2012, lalu terminal bas nya berengkah dikena Mei 2012, pengemeran bas ekspres di terminal lama Batu 4 udah bepindah ngagai Terminal Bas Wilayah Kuching Sentral.
Senipak enggau digelar nyadi hub pengangkut darat besai, Kuching Sentral ngemeranka atur terminal ti moden sereta sistematik baka tikit bekomputer, papan elektronik kelimpah ari nyendiaka perengka guna, pengelantang enggau pengelikun mensia mayuh ti datai kia.
Sepemanjai taun 2013, dirikodka penyampau 272,255 iku orang tambang di Kuching Sentral dibandingka semina 190,335 iku orang tambang naka suku ke-3 2012.
Penyampau orang tambang ti pemadu mayuh dirikodka iya nya maya musim pengerami nyengkaum Hari Krismas, Hari Gawai, Hari Raya Aidilfitri enggau Taun Baru Cina.
“Sepenyampau 14 buah kompeni bas ekspres ti beoperasi di Kuching Sentral nyengkaum dua kompeni bas ari Indonesia, ti mungkur 80 pejalai bas tiap hari enggau penyampau pejalai bas deka nambah 100 kali sehari maya bisi pengerami,” ku Bujang.