Anda di sini

PIP deka ngatur program peransang di SK Kelawit

Advertisement

Seraban tiga iku pengelicha ti bepenemu sereta bepengelandik deka mantu ngemujurka program nya kena 15 Feb tu

SIBU: Pegari Iban Production (PIP) deka ngatur program licha peransang ba Sekolah Kebangsaan (SK) Kelawit, KM 68, Jalai Tatau-Sibu kena 15 Februari ti deka datai.

Program tu diatur begulai enggau sekula nya beserimbai enggau ‘Hari Apai Indai Nembiak 2014’.

Tuai Besai PIP Johnny Chuat madah, program nya ila deka disempulang tiga iku pengelicha ‘volunteer’.

“Seiku ari pengelicha iya nya Dr. John Brian Anthony ke deka datai ari Kuala Lumpur lalu endang pengelicha ti udah chukup pegari nama lalu teleba meri peransang kelebih agi ngagai apai indai nembiak.”

“Pengelicha ti kedua iya nya Tedong Gunda @ Jamal Abdullah ari Miri lalu iya tu mega seiku ari orang ti udah suah meri licha ba mayuh bengkah pengawa, nyengkaum licha ngagai apai indai enggau bala nembiak sekula lalu iya bisi pelajar Master of Science ba Occupational Health lalu gawa ba seiti kompeni minyak enggau gis ba Miri.”

“Pengelicha ti ketiga iya nya seiku pemesai ari Majlis Amanah Rakyat (MARA) pampang Bintulu, Mohamad Kawi lalu iya deka nerangka utai ke ulih dibantu MARA ngagai nembiak sekula sereta nerangka pasal chara nembiak ulih masuk ngagai sekula MRSM,” pia ku iya madah ngagai pengarang berita, kemari.

Berindik ari nya, Johnny ngarapka mayuh apai indai ulih ngulu pengawa ti manah tu laban pengawa tu endang diungkupka enggau enda bebayar lalu orang ke meri licha mega datai enggau ati lurus deka ngemansangka nembiak sekula.

“Kami PIP meri besai terima kasih ngagai pengeransing ati bala pengelicha ti udah enda ngira rugi muai hari, muai awak sereta bekenaka belanja diri ketegal ti deka meda pemansang nembiak sekula.

“Pengawa ke baka tu endang pengawa ti udah lama dikereja kami ari PIP. Kelimpah ari ti ngeluarka bup bacha dalam jaku Iban, kami mega ulih dikangau meri motivasyen enda milih dini-dini menua lalu kami deka ngaul raban inteleks ke ulih meri licha ti meri pengerembai penemu ngagai mensia mayuh,” ku iya madahka baru.

Kelimpah ari nya, Johnny mega madahka, enti nadai penanggul, ujung bulan Mach tu ila mega PIP deka ngaga motivasyen ba SMK Suai, Niah lalu diatu PIP benung ngumpul raban volunteer ke ulih nulung meri penemu maya nya ila.

Advertisement