ZAHID
KUCHING: Penyampau pengawa salah di Sarawak ngayanka mimit penurun enti dibanding enggau renggat nasional tang pengawa bechurika kerita niki 130 peratus.
Menteri Dalam Menua, Datuk Seri Ahmad Zahid Hamidi madah, pengawa bechurika kerita enggau mutosikal majak nambah laban nyangka ari pemuntang jalai bumbus ba garis antara menua Sarawak enggau Indonesia.
“Pekara tu deka dibai ngagai aum enggau Menteri Besai (PM) ke nyadi chairman atur pengawa nya dua kali seminggu ari baruh pekara ‘Majlis Keselamatan Negara’ berindik ari jalai ke bumbus mit-mit ke dikumbai ‘jalai tikus’ diatu udah sawang nyadi ‘jalai gajah’!
“Ukai semina nya aja, pengawa bebaika barang ari menua tu ngagai menua sepiak nyin pan majak nyadi lebih agi barang sabsidi lalu ditambah agi enggau orang ari menua luar ke enchuri tama ngagai menua tu enggau nadai pemendar pan majak nambah,” ku iya.
Iya madah baka nya lebuh bejaku ba aum media pengudah bejadika Penumbuh RELA ti Ke-42 Taun ke digulu urung 10,000 kaban RELA begempuru di Palan Konvensyen Borneo Kuching (BCCK) ditu, kilah ensana.
Ahmad Zahid madah, Perintah Menua Malaysia deka negutka agi kerejasama nengah GBC (General Border Committee) begulai enggau Kepala Polis Malaysia sereta Indonesia, nyengkaum kerejasama soldadu darat enggau tasik Malaysia enggau Indonesia, ngambika pengawa salah baka tu ulih diputar enggau jampat.
Iya nambah, baka orang ari menua sepiak nya ke gawa ditu enggau chara enda beradat tauka ngemenuhka menua tu ngiga pengawa deka diputarka perintah besai.
“Undang-undang imigresen Sarawak enggau Sabah enda sebaka enggau semenanjung laban ke diatu atur nya bepanggai ba penyampau pengereja pengawa menua luar ke diguna di Sarawak.
“Tang dalam aum ‘kabinet khas’ bekaul enggau pengereja pengawa menua luar gawa ditu, perintah nengeri Sarawak udah mutuska deka nitihka sistem di semenanjung, alai pengawa beambika pengereja pengawa di kebun tauka barang endur deka diputar antara kededua perintah (G2G), undang-undang nya deka dikena di Sarawak,” ku iya.
Naka ke diatu,pemayuh orang ari menua luar ke gawa di menua tu manggai 30,000 iku.