NAKA NYA MIH: Taib nyauka surat ngelengka pengawa nyadi Kepala Menteri ngagai TYT berengkah 28 Februari tu.
Berindik ari pangku pengawa baru Taib nyadi Tuai Pemegai Menua, sitak bepilih Balingian kusung
KUCHING: Berindik ari Kepala Menteri Pehin Sri Abdul Taib Mahmud ke deka mangku pengawa nyadi Tuai Pemegai Menua (nganti pemendar ari Menteri Besai enggau Yang Dipertuan Agong), sitak Balingian dipelaba deka dilengkaka Taib.
Dalam pekara tu ku Taib, sebarang pengawa bepilih mit ke deka diatur ila, nya bepanggai ba rintai penyendia pengawa bepilih ti betuaika Kepala Menteri baru, Tan Sri Adenan Satem.
“Enti sema aku dipadu nyadi Tuai Pemegai Menua (TYT), udah tentu kerusi Balingian nya kusung. Atur pengawa bepilih mit nya bepanggai ba Kepala Menteri baru ke ngayanka kaul pengawa keterubah iya enggau raban Barisan Nasional (BN) bukai.
“Aku nyerah ngagai Kepala Menteri baru sapa ke deka diasuh iya bediri di Balingian ila,” ku iya.
Iya madah baka nya lebuh dikerandau ba aum media pengudah nyuaka surat ngelengka pengawa nyadi Kepala Menteri belabuh 28 Feb tu ila seraya melaba deka besumpah nyadi TYT ke baru ba hari ke sama.
Lebuh ditanya sekalika iya berasai sinu ninggalka pengawa ke udah dipejalai pengelama 33 taun, ku Taib: “Aku enda tusah ati laban aku ngelengka pengawa aku ba orang ke bepeneleba, lalu aku endang pechaya ke sida iya deka ngereja pengawa nya enggau naka penyulut.
“Semina utai dikelengauka aku, iya nya pemayuh pengawa aku baka ke udah laban aku udah teleba ngereja pengawa mayuh napi macham pemar,” ku iya.
Lebuh ditanya baru, pengingat iya ba pengawa iya ke pengabis nyulut kala digaga iya, iya madah:“Pelaba aku, enda aku tak kelalu pandai tang enggau ati ke baruh, semina sebengkah ke ngasuh ati ku puas, iya nya meda dalam BN, penyerakup entara pupu bansa udah majak nambah kelebih agi ba bansa asal menua tu.
“Ba aku, aku enda tepintaka peluang ke pengabis manah gawa ke menua enggau naka ulih sereta pengurang, tang sebengkah pemerat, iya nya aku seruran lantang ati gawa enggau kaban kabinet aku dalam berapa taun tu ke udah,” ku iya.
Taja pan, dalam berapa taun ke udah, sepiak penyakal pan udah nambah, reti nya dalam 20 taun tu ke udah, pemansang politik kitai pan udah nambah.
“Enti diperatika, kitai udah mayuh wakil penyakal, enda salah ba aku, nadai penyelai asal sida iya enda ngelui adan,” ku iya.
Pangku pengawa Tuai Pemegai Menua ke diatu Tuan Yang Terutama Yang Dipertuan Negeri Tun Muhammad Salahuddin deka tembu timpuh kena 28 Februari tu.
Lalu disadang, Taib (agi nganti pemendar ari Agong enggau Menteri Besai) deka mangku pengawa nya belabuh ari 1Mac tu ila.