Anda di sini

KPDNKK taun tu naka diatu mujur nangkap 58, 000 liter diesel berega RM240,000: Tan

Advertisement

KUCHING: Sarawak naka diatu dalam taun 2014 bisi ngerikod tiga kes bekaul enggau ulah salah guna minyak diesel penyampau 58,000 liter berega RM240,000.

Direktor Opis Dagang Dalam Nengeri, Koperasi enggau Pekara Bebeli Barang (KPDNKK) Nengeri Sarawak, Stanley Tan madah, dua kes nyadi ke bulan Februari enggau seiti kes dirikod ba bulan Januari.

Nitihku iya barang ke ditangkap nya nyengkaum sebuah pajero enggau kapal berikan kelimpah ari minyak diesel sabsidi.

“ Kena 10 Februari pukul 4.00 lemai di barrage Sejingkat Kuching kami (KPDNKK Nengeri Kuching) bisi nangkap 20,000 liter minyak diesel sereta seiku jeragan enggau seiku pemantu kapal berikan nya.

“Apin lama kena 5 Februari kami mega bisi ngetanka sebuah pajero enggau minyak diesel 1,000 liter enggau penyampau rega barang nya RM26,000 di kandang menua Siburan. Seiku lelaki umur urung 30 lebih ditangkap benung iya ngisi minyak diesel ngagai tangki besi ke digaga baru di belakang pejero.

“Sepenyampau 37,000 liter minyak diesel mega ditangkap polis Marin Miri di stor ba kandang menua Piasau Industrial Estate Miri, lalu diserah ngagai kami. Penyampau rega barang bisi RM74,000.

“Ketiga kes nya dibaruh Sekyen 21 Akta Kawalan Bekalan 1961, ngembuan barang ti dijaga perintah ti dipelabaka ngereja tauka deka ngereja penyalah di baruh akta nya,” ku iya.

Tan dikerandau pengarang berita pengudah ngabas 20,000 liter minyak diesel ke ditangkap ba sebuah kapal berikan ti ditan ba pangkalan Polis Marin Bintawa ditu, pagi kemari.

Nitihka Seksyen 21 Akta Kawalan Bekalan 1961 enti ditemu salah, orang sesiku (penyalah keterubah) tau ditinggang ukum enda lebih ari RM100,000 tauka dijil enda lebih ari tiga (3) taun tauka kededua ukum nya, lalu penyalah ti kedua kali ulih diukum enda lebih RM25,000 tauka dijil enda lebih ari liam (5) taun.

Dipelabaka minyak diesel deka dijual ngagai menua luar tauka industri, ku iya.

Lalu bepelasarka seksyen ti sama, koporat enggau kompeni ti ditemu salah, (penyalah keterubah) ulih diukum enda lebih ari RM250,000 enggau penyalah ke udah nya ulih diukum enda lebih RM500,000.

Ku iya, semua asil pengawa nangkap nya mega dipejalaika entara KPDNKK Nengeri Sarawak begulai enggau Polis DiRaja Malaysia.

Lebuh ditanya bekaul enggau jeragan sereta pemantu kapal berikan nya iya madah, kededua iku nya deka dipansik sereta dirikod jaku.

“Jeragan enggau pemantu ke beumur urung 30 lebih nya orang ari menua luar tang kapal berikan ke dikena nya kapal berejister,” ku iya.

Nyempulang Tan kemari, Kepala Penerit Adat KPDNKK Nengeri Sarawak Robin Emerson Empurai.

Advertisement