SIBU: Perintah ngeletakka pekara pelajar nyadi pekara berat kena nempa modal mensia ke bekualiti ngambika bisi ngemansangka menua Malaysia tu jemah ila.
Menteri Muda Dagang Temuai (Atur Pengawa & Produk) Datuk Gramong Juna madah, bidang pelajar terus dikemeratka perintah menua kena nempa rayat ke pandai sereta ulih ngemujurka juluk 2020.
“Enda kira dini endur kita baik nya ba menua pesisir tauka di ulu entigis, nadai kebuah kita enda teulihka pelajar ke chukup.
“Perintah udah ngerembaika segenap pekara pelajar kena ngemansangka sekula ngambika ninting iku rayat kelebih agi nembiak rebak baru enda cherayan ba pelajar sekula,” pia ku iya.
Iya bejaku munyi tu lebuh bejadika Pengerami Makai Lemai Ngulihka Belanja Pemansang Sekula China (SJKC) Yee Ting, Kanowit beserimbai enggau Taun Baru China ti diatur ba Dewan Opis Pelilih Mit Kanowit diti, empai lama ke udah.
Sama bisi ngulu pengerami nya, bini iya Datin Catherine Gramong, Kaban Parlimen Kanowit Datuk Aaron Ago Dagang enggau bini iya isteri Datin Ping Bungan, Sekreteri Politik Kepala Menteri Maurice Giri enggau Chairman Pengatur Ngulihka Belanja Pemansang SJKC Yee Ting, Kong Shian Yung.
Gramong ke mega Menteri Muda Pemansang Tanah meransang rayat ba kandang menua nya meri terima kasih laban perintah ngemeratka pemansang sektor pelajar di menua tu kena nempa mayuh agi orang ke pepandai sereta landik nyerumba taun 2020.
Ku iya, perintah ngarapka sukung ari semua nyaup ngemujurka polisi perintah ti deka pulaika pengelantang rayat empu.
“Apai indai patut meri kerejasama sereta bebendar deka ngemansangka pelajar anak sida nengah chara meri sukung ngagai semua atur pengawa ke dipejalaika sekula kena nyungkak tikas pemanah pelajar.
“Semua raban sekula patut begempung enggau sekula ngambika kitai sama bela ulih ngemajuka anak kitai ti ngujungka sida mujur dalam penlajar enggau kurikulum dudi ila,” pia ku Kaban Kunsil Nengeri (ADUN) Machan nya.
Berebak enggau nya, Gramong enggau Aaron sama bela meri RM50,000 seiku, kena ngemujurka atur pengawa ngulihka belanja pemansang sekula nya.