KUCHING: Gereja Anglikan Sarawak ensana mansutka penerang muji Kepala Menteri Pehin Sri Abdul Taib Mahmud ketegal berani sereta nyemetak penemu bekaul enggau kontroversi leka jaku ‘Allah’.
Berindik ari nya , Kepala Bishop Anglikan Asia Tenggara Datuk Bolly Lapok ngarapka di baruh pegai penganti Taib ila, nengeri enggau menua tu deka terus ngasaika pemaik jalai pengarap nya sampai ke nadai tatak.
“Kami ngarapka di baruh pegai penganti iya, kaul kitai tetap ditan lalu nengeri deka terus ngasaika pemaik,” ku iya dalam sebengkah penerang .
Bolly madah, Sarawak tetap likun taja pan ngembuan mayuh bengkah raban bansa enggau jalai pengarap.
Ku iya, Taib sebaka penemu enggau Kepala Menteri ke dulu suba iya nya Abdul Rahman Ya’kub.