KAPIT: Rayat ke bisi ngembuan tanah ti kena tujah Projek Jalai Kapit-Song-Kanowit ditangkan anang terunda nyual tanah sida ngagai orang bukai ti deka beambi ulih.
Menteri Pemansang Menua Pesisir enggau Kandang Menua Datuk Seri Mohd Shafie Apdal (gambar) madah, bisi dedinga rega tanah ti kena bungkur projek jalai deka niki agi rega lalu tu tau bendar ngelimpangka runding rayat nyual tanah sida.
“Ambika banding maya aku nemuai ngagai sekeda menua di Semenanjung Malaysia dua minggu ke udah, tanah ke dipansa projek jalai niki rega ngagai RM200,000 seikar.
“Tu endang pekara ke suah dipeda nyadi bepun ari projek jalai alun. Tang kitai ngarapka rayat kelebih agi baka rayat ti bisi tanah ke ditujah projek jalai alun tu ngambika berunding dulu sebedau ngaga pemutus (nikika rega),” ku iya.
Iya bejaku munyi nya maya aum pengarang media sepengudah nemuai meda projek jalai nya, lemai ensana.
Dulu agi ari nya, iya bejadika Pengerami Nyuaka Bantu Sekula ngagai 1,000 iku nembiak primari enggau sekondari bagi Parlimen Kapit ba Dewan Suarah Kapit ditu.
Pengerami nya bela digulu Sapit Menteri Pemansang Menua Pesisir enggau Kandang Menua Datuk Alexander Nanta Linggi, Menteri Muda Main Asal Liwan Lagang, Sapit Ketuai Sekretari Pelin Pemansang Opis Menteri Pemansang Menua Pesisir (KKLW) enggau Kaban Parlimen HUlu Rajang Wilson Ugak.
Shafie maya tu mega madahka Projek Jalai Kapit-Song-Kanowit enda semina digaga ketegal ngembuan tuju deka ngemuntangka rayat mindah kin-kitu tang sebengkah ari chara dikena ngangkatka pengidup rayat nambahka penatai pemisi.
Ku iya, rayat kelebih agi ti kena bungkur projek nya patut landik ngena awak nya nyungkakka batang penatai pemisi ke endang udah dikemeratka ngelama tu baka pengawa betanam betupi.
“Projek tu nyadika sejarah ngagai nengeri tu ti deka pulaika penguntung ngagai lebih 40 ribu rayat ditu.
“Seiti ari penguntung iya nya, rayat menua pesisir ulih nyungkakka penatai pemisi sida baka mai asil betanam betupi sida ngagai mengeri besai,” ku tnadu iya.
Ba renggat keterubah Projek jalai Kapit-Song-Kanowit tu sepemanjai 1.9 KM enggau ungkus RM15.9 milliun lalu ba renggat kedua 10.5 KM beungkus RM64.4 milliun ti naka ke diatu udah tembu 40 persin.
Renggat ketiga, keempat enggau kelima projek jalai nya sepemanjai 33.4 KM beungkus RM348 milliun nyengkaum sebuah jematan di Kanowit.
Shafie madah, naka ke diatu projek nya mujur diatur taja bisi penekul mimit nyadi.
Tang iya madahka diri andal projek bagi renggat kedua deka tembu bulan Oktober tu.
“Udah nya jalai tu deka disambung urung 30 lebih kilometer agi sebedau dipajakka ngagai mengeri Sibu,” ku iya.
Maya ditanya senentang perambu deka ngagai projek jalai alun ngelawa Kampung Pulau Bruit, Daro, ku Shafie, pekara nya dulu agi dikerandau enggau pemesai bagi kandang menua nya.
Ku iya, taja rayat ke ngembuan menua nya mimit tang perintah deka mansik pematut projek jalai alun digaga dia.
“Tang kitai ukai semina ngemeratka projek jalai alun aja tang nyengkaum projek kebukai baka bekal ai paip,” pia ku iya madah.
Berebak enggau tu mega iya bisi ngerahka bantu RM14 milliun ngagai Parlimen HUlu Rajang.