SERIAN: Lebih 1,000 iku orang ti enda ngira pupu bansa datai ngagai pengerami Rumah Tebuka Taun Baru China 2014 ti diatur Opis Menteri Penguasa Pemayuh Tubuh enggau Pengereja Pengawa (KSM) ba Dewan Masyarakat Serian apin lama, nunjukka penegap enggau penyerakup rayat enggau menua.
Menteri Penguasa Pemayuh Tubuh enggau Pengereja Pengawa, Datuk Seri Richard Riot Jaem madah, pengabang ti enda ngira bansa nya nunjukka penyerakup rayat nengeri sereta lebih agi di menua Serian.
Iya madahka penyerakup pupu bansa nya amat beguna dikena ngetanka penegap bansa enggau menua.
“Ba pengerami ke diatur tu mayuh orang datai enda ngira pupu bansa bisi datai sama ngulu pengerami tu, enti baka tu belama aku arap bendar Serian deka maju jemah ila.
“Serian mega tau dichunto laban semua pupu bansa enda ngira sekalika Melayu, Iban, Bidayuh, China, Orang Ulu enggau ke bukai seruran bebasaka pangan diri, lalu ari penyerakup ti baka tu dia nadai orang ulih ngachau tauka ngeruga kitai,” ku iya ti nyadi Kaban Parlimen Serian.
Riot mansutka pekara nya lebuh bejaku ba ‘Program Gerak Gempur YB Menteri Sumber Manusia Turun Padang’ seraya nyambut Hari Tebuka Taun Baru China 2014, ti diatur ba Dewan Masyarakat Serian, ditu apin lama.
Nitihku iya tiap kali bisi pengerami endang dikerami begulai ulih semua pupu bansa di Serian.
Dulu ari nya Riot disempulang bini iya, Datin Seri Betty Mincha bejalai seraya betemu enggau orang dagang di Pasar Basah Serian.
Ba pengerami Rumah Tebuka Taun Baru China 2014 nya, mayuh program diatur nyengkaum tanda asal ari tetiap pupu bansa ti bisi di pelilih menua Serian baka ngajat, tanda asal Bidayuh, tanda singa enggau kebukai.
Sama bisi datai bapengerami nya, Sekretari Politik Opis Menteri Penguasa Pemayuh Tubuh enggau Pengereja Pengawa Mejar (B) Peter Runin, Sekretari Besai SUPP Prof. Dr. Sim Kui Hian.