KUCHING: Kepala Menteri Pehin Sri Abdul Taib Mahmud deka betemu enggau Tuai Pemegai Menua (TYT) Yang Dipertua Negeri Sarawak, Tun Muhammad Salahudin kena 15 Februari tu bekaul enggau pangku pengawa ngelengkaka diri nyadi Kepala Menteri.
Taib lebuh dikerandau pengudah bejadika Penumbuh RELA ti Ke-42 Taun di Palan Konvensyen Borneo Kuching (BCCK) ditu, udah netapka haribulan nya lalu ku iya, ke diatu, iya deka nembuka sekeda pengawa ke agi tinggal sebedau ngelengka pangku pengawa Kepala Menteri.
Ba pekara ke sebaka mega, Menteri Dalam Menua, Datuk Seri Ahmad Zahid Hamidi (gambar) nyerumba penemuai dua hari iya ke Sarawak madah, ba penemu UMNO ti mega sebagi ari komponen parti Barisan Nasional (BN), sida iya bebasaka pemutus nya ukai semina di Sarawak aja tang nengeri bukai mega.
“Di Sarawak Parti Pesaka Bumiputera Bersatu Sarawak (PBB) betuaika Kepala Menteri lalu tiap pemutus ke digaga iya patut dibasa laban ba aku tiap pemutus nya ngemeratka Sarawak.
“Utai ke nyadi mandangka politik Sarawak tu tuai runding, sebarang ubah ke nyadi, nitihka atur undang-undang menua, baik nya betukar kuasa nitihka chuan politik menua tu tauka besilih ketuai.
“Nya alai, pemutus iya patut dibasa semua parti komponen BN nyengkaum UMNO, laban pemutus nya datai ari Taib empu,” ku Ahmad Zahid seraya netapka 15 Februari nya haribulan Taib deka betemu enggau TYT.
Ba pengawa bepilih mit enti bisi dalam timpuh ke diatu maya Taib ngelengka pangku pengawa nyadi Kepala Menteri, iya madah nyangka pengawa bepilih mit nya enda digaga dalam timpuh ke diatu laban enti nitih, hari bulan ke pengabis penudi Sarawak patut ngatur pengawa bepilih besai menua, iya nya kena 20 June 2016.
“Nya alai, ba raban pengelikun, sekalika bisi pengawa bepilih tauka nadai, kami tetap nyendiaka diri belama ngambika pengelikun di menua tu terus dijaga lalu baka nya mega enggau sitak menua bukai di Malaysia,” ku iya.
Ba aum iya enggau kededua piak ketuai ari Parti Sa’ati Rayat Sarawak (SUPP), ku Ahmad Zahid, iya udah betemu enggau kededua piak pemesai nya lalu udah ngelalau sida iya ngasuh sida iya bebaik baru.
“Taja pia, aku deka nanya ngagai Opis Pengerejister Gerempung (ROS) empu,” ku iya.
Sebedau nya, Menteri Pengatur Pengeraja Asal Kedua, Datuk Amar Awang Tengah Ali Hassan madah, aum sida iya ensdanus begulai enggau Kepala Menteri enggau Ahmad Zahid empu semina bejuraika pekara pengelikun menua, gaya politik di menua tu enggau sekeda pekara bukai.
“Aum kami baka selama…Tu ukai aum ngenyit lalu nadai berandauka pengawa bepilih ke sitak menua tu,” ku Awang Tengah.
Ba atur pengawa bejadika Penumbuh RELA ti ke-42 taun, Ahmad Zahid madah, di Sarawak aja, bisi dalam 229,000 kaban RELA lalu ari penyampau nya semina, 10 persin aja ke udah bisi uniform.
Nya alai, ku iya enti ulih minta Perintah Menua Sarawak mantu RELA di menua tu ngulihka uniform sida, alai udah nya Taib besemaya deka meri RM250,000 ngagai RELA menua tu kena sida iya ngaga uniform.
Kelimpah ari nya, Perintah Menua Sarawak mega deka meri tanah ngagai RELA kena sida iya ngaga opis RELA ungkup menua tu.
Ba atur pengawa nya mega, Taib diberi gelar Sapit Ketuai Pesuruhjaya Kehormat RELA, kelimpah ari ngepunka atur pengawa raban RELA bebasikal.
Sama bisi nguluka aum media enggau atur pengawa nya, Sapit Menter Dalam Menua, Datuk Wan Junaidi Tuanku Jaafar, Kepala Polis Menua Malaysia, Tan Sri Khalid Abu Bakar, Sekretari Perintah Besai pampang Sarawak, Datu Yahaya Basimin, Pesuruhjaya ti mega Kepala Direktor Opis Sukarelawan Malaysia (RELA), Datuk Mustafa Ibrahim enggau sekeda menteri kabinet bukai.