KAPIT: Kaban opis kaunsil kelebih agi ke baru dipadu di Kapit dilalau bejalaika tanggungpengawa enggau manah ngambika ulih ngemansangka sitak nya.
Ku Menteri Kanan ke mega Menteri Pemansang Tanah Tan Sri Datuk Amar James Masing, kaban opis kaunsil patut ngena kuasa diri empu nyungkakka atur pemansang di bagi menua Kapit.
“Semua kaban Opis Kaunsil Pelilih Mit Kapit (MDK) ngembuan tanggungpengawa nyaga menua Kapit. Aku ngelalau tetiap kaban opis kaunsil berani ngesan tanggungpengawa kita enggau bebendar.
“Ingat! Atur nyirika kita ketegal tanggungpngawa enggau komitmen. Kita mesti berani ngesan tanggungpengawa ke udah digaga kita,” ku iya maya bejadika Pengerami Angkat Sumpah 32 Kaban Opis Kaunsil Pelilih Mit Kapit (MDK) ditu, apin lama ke udah.
Masing madah, taja pan Kapit agi kurang ari sukut pemansang, tang kaban opis kaunsil enda patut bekerendut tubuh tang patut nyaup mai pemansang jemah.
“Dua taun ti deka datai, aku deka meda bakani kita ngemansangka menua Kapit,” ku iya.
Kelimpah ari nya, Wali Kota ke mangku baru pengawa iya Philimon Nuing madah, pengerami ngangkat sumpah tu ulih nyadi ke tenggau ngagai semua kaban opis kaunsil bejalaika pengawa ngarika opis penguasa kandang menua enggau bebendar, penuh komitmen sereta beempu tanggungpengawa.
“Penyampau bala kaban opis kaunsil indu mega bisi nambah ari tiga ngagai tujuh iku. Tu kelai perintah Barisan Nasional (BN) meri kuasa ngagai orang indu ngambika sida mayuh agi dichiri ba opis kaunsil.
“Serak tu mega, kitai bisi 16 iku kaban baru ari penyampau 32. Lalau aku nuju kaban ke lama (ke dipadu baru) ngembing kaban ke baru. Pekara ke pengabis beguna, kita mesti gawa begulai tauka begempung dalam seiti tim. Rayat aruh dikemeratka dulu,” ku iya.
Philimon ke mangku pengawa nyadi Wali Kota sekumbang taun 2003 mega beterima kasih ngagai perintah laban udah pechaya ke iya nyadi ketuai MDK.
Bisi datai ba pengawa nya, Menteri Muda ba Opis Kepala Menteri (Pekara Adat Bumiputera enggau Penan enggau Perintah Menua) Datuk John Sikie, Menteri Muda ba Opis Kepala Menteri (Pesaka Lama) Liwan Lagang, Kaban Parlimen Hulu Rajang Wilson Ugak Kumbong, Sekretari Politik Kepala Menteri Wilson Nyabong enggau Jefferson Jamit.