KUCHING: Sapit Kepala Menteri Datuk Patinggi Tan Sri Alfred Jabu ngutuk pengawa kimpin ke digaga peranak menua luar ke ngasuh ‘boikot’ produk minyak sawit di menua tu.
Ku iya, ulah sida tu sebaka enggau pengawa nyekat pengelantang pendiau beratus ribu orang asal menua tu ke bepanggai pengidup ba kebun kelapa sawit.
“Nyadi menteri ke beempu tanggungpengawa dalam pekara pemansang menua pesisir sereta nyungkakka pengawa betanam betupi, aku mantah kimpin tu laban sida tu ngasuh pengawa perintah puntan ngemansangka tanah Adat Asal Bumiputera (NCR) ke nyadi penatai pemisi ke besai ngagai komuniti menua asal di Sarawak.
“Kitai patut nagang pengawa jai tu ke deka meda pemerinsa komuniti kitai,” ku iya madah lebuh bejadi ‘Poverty Eradication Through Land Development: The SALCRA (Sarawak) Experience’ kena Hari Satu tu tadi.
Iya mega nyangkal jaku raban NGO ari menua luar ke madahka pengawa bekebun sawit di Sarawak semina ngerusakka pendiau jelu mayas.
Ku Jabu, NGO menua luar enda nemu, kebun sawit di Sarawak dikemansang di luar palan pendiau mayas kelimpah perintah ngaga sebuah palan alai jelu siga diau ngambika enda punas.
Bekenangka SALCRA, ku iya madah ijinsi tu pemadu efektif mutarka tikas penyeranta di menua tu sekumbang ditumbuh ari 1976.
Ku tandu iya, SALCRA diatu udah mayuh mantu pengempu tanah NCR ngemansangka tanah NCR sida iya (semadi enda dikereja) nyadi kebun sawit, ngambika ulih meri mayuh penguntung ngagai pengempu tanah.
Datai kediatu, ku Jabu, SALCRA udah mayar urung RM653 juta penyampau dividen ngagai urung 17,000 pesereta kelimpah ngasaika penguntung bukai nyengkaum teulihka pala tanah, peluang gawa enggau pengelantang pendiau, lun enggau bantu anak besekula.
Dulu agi ari nya, Jabu meda pengawa ngelancharka bup MPOC, ‘Back to Basics: Culinary Delights with Palm Oil’ ke mantaika resipi minyak kelapa sawit ke ulih dikena chef tebilang di dunya.
Pia mega, iya bisi meda pengawa nyain sempekat (MoU) antara MPOC enggau Opis Kampung Sarawak (SFC) ungkup ‘Program Pemuliharaan Orang Utan’ di Sedilu- Ulu Sebuyau – Gunung Lesong enggau ‘Program Kompleks Taman Negara Maludam’.