KUCHING: Genap perambu atur pemansang ti diungkupka ngagai nengeri tu patut ngemeratka pengutung penggi semua raban bansa.
Kepala Menteri, Pehin Sri Abdul Taib Mahmud madah, nya beduduk ari pengerembai pengelantang enggau penyerakup senipak enggau pemayuh penyampau mensia jemah ila.
Ambika banding ku iya, Kuching aja diatu bisi 800,000 iku mensia.
“Kitai enggau naka ulih ngemeratka pemansang nengeri ti berurun sereta ngembuan pengelanchar pengerembai pengawa diungkup ke rayat nyerunyut pengelantang enggau penyerakup.
“Nya alai enda ngira bengkah perambu pemansang ti dipejalaika, atur nya patut nguntungka rayat, kebuah pia laban pengelantang enggau penyerakup deka majak ngerembai senipak enggau pemayuh penyampau mensia,” ku iya.
Taib mansutka pekara nya lebuh bejaku seraya bejadika Terminal Bas Bersepadu Wilayah, Kuching Sentral ti diatur Permodalan Assar Sdn Bhd ba Kuching Sentral ditu pagi kemari.
Nandu baru iya madah, ke Kuching mensia mayuh ukai semina ngena bilun aja tang mega nyengkaum sistem pengangkut darat baka bas enggau kerita.
Ngelama tu ari Kuching ke Sabah, Lawas, Limbang, Brunei sereta Kalimantan Barat ulih ngena perengka pengangkut darat baka bas.
“Berindik ari pekara nya, diatu kitai ukai patut mutarka penanggul pemupuk enggau penyangkai rayat aja tang nyangkaum ngangkatka pemanah kaul di serata mengeri di Sarawak ti udah disikap perengka penyambung nengah sistem pengangkut.
“Kuching Sentral tu diperambu ngambika ngelanchar pejalai trafik, lebih agi ngemuntangka rayat kitai ti mindah kin kitu ngena bas nengah terminal tu,” ku iya.
Kelimpah ari nya iya madah, orang mayuh ti ngena bas mega patut ngatur sereta ngenukuka pejalai sida ngambika nadai penanggul ba diri.
“Reti iya ditu, sistem penerang patut bisi disedia ngambika enda masau jam mensia mayuh ti bekena perengka pengangkut baka bas.
“Taja pan terminal enda nunjukka projek ‘sophisticated’ tang dibelakang iya kitai ulih meda sebengkah sistem ti meri servis ngagai rayat, lebih agi penyampau tubuh mensia jemah ila,” ku iya.
Sama datai ngulu atur pengawa nya kemari, bini Taib, Puan Sri Ragad Kurdi Taib; Pengerusi Lembaga Pengarah Permodalan Assar Sdn Bhd Tan Sri Datuk Amar Bujang Mohd Nor; Sapit Kepala Menteri Datuk Patinggi Tan Sri Alfred Jabu Numpang; Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah; General Manager Permodalan Assar Sdn Bhd Ghazali Ismail enggau ke bukai.