Anda di sini

119 nembiak sekula SK Kuala Baram 1 nerima bantu MEMBARA

Advertisement

MIRI: Bisi 119 iku nembiak nyengkaum prasekula Sekolah Kebangsaan (SK) Kuala Baram 1 nerima Program Mantu Rayat (MEMBARA) ‘Kembali Ke Sekolah’ ke disua Menteri Muda Penyambung enggau Lumba, Datuk Lee Kim Shin ditu, apin lama.

Program nya diatur Opis JASA Sarawak Miri nyuaka kereban bantu sekula ngagai nembiak sekula nya.

Lee ngelalau raban orang kurang benasit enda ibuh nangi nganjung anak sida besekula laban perintah bisi nyendiaka bantu.

“Apai indai tauka bala ke ngibun nembiak nya ke kurang tauka jelan penatai pemisi enda patut nangika diri enda ulih nganjung anak besekula.

“Tu laban perintah semampai sinu, nya alai, mayuh bantu tauka program udah disediaka perintah berengkah ari renggat prasekula nyentuk ke pelajar tinggi,” ku iya.

Lee ke mega  Kaban Kunsil Nengeri  (ADUN) Senadin antara sekeda chunto bantu ke disediaka perintah baka bantu bup teks sekula, bantu sekula RM100, baucher bup 1Malaysia di peringkat palan pelajar tinggi enggau ke bukai.

“Kelimpah ari nya, mega bisi disediaka bantu pinjau Wang Turu Pelajar Tinggi Bansa (PTPTN) ke diungkupka ngagai sida ke nampung pelajar ngagai palan pelajar tinggi.

“Nya alai, nadai kebuah kita ke nyadi apai indai enggai nganjung anak kita besekula tauka nampung pelajar anak kita ngagai palan pelajar tinggi,” ku iya.

Berebak enggau nya mega, iya meransang bala nembiak sekula ngambika belajar bebendar ke pengelantang pengidup jemah.

“Pekara pelajar chukup beguna laban kita ke dudi deka nampung merintah menua tu ila.

“Pia mega, kita deka ngisi pengawa puang ke udah  disediaka perintah ila,” ku iya.

Ba pengerami nya, bala nembiak sekula nya mega bisi nerima beg sekula enggau kereban dikena belajar baka sarang pensil, kereban kena nulis, pensil chura enggau butul ai.

Sama bisi datai Kepala Pengajar SK Kuala Baram 1, Maseri Matnor enggau Pemesai Pemadah (Penyelaras Parlimen Miri) Opis JASA Sarawak bagi menua Miri, Dayang Norazelina Hamdan.

Advertisement