TANDA PENGAGA: Salahuddin (tengah) enggau bini iya sereta pemesai bukai nyirap kek kelai bejadika pengawa Ngelalu Pengabang Taun Baru China Bintulu, ditu pagi ensana.
BINTULU: Urung 20,000 iku mensia ari genturung pendiau ti bekelingi bela datai ngagai pengerami Ngelalu Pengabang Taun Baru China (TBC) 2014 ti diatur Kaban Parlimen Sitak Bintulu Dato’ Seri Tiong King Sing ba Dewan Suarah Bintulu ditu, pagi ensana.
Ba pengerami ti diatur bepun ari pukul 8.00 pagi nyentuk 1.00 ngalih hari nya, iya mega bisi digulu bala pemesai menua tu nyengkaum ketuai ari tiap bengkah ejensi perintah enggau peribit, raban orang dagang enggau industri sereta raban Gerempung Ukai Dikuasa Perintah (NGO) ti aktif ditu.
Urung pukul 10.00 pagi, Tuai Pemegai Menua (TYT) Tun Datuk Patinggi Abang Mohammad Salahuddin enggau bini iya Toh Puan Datuk Patinggi Hajah Norkiah disempulang Residen Pelilih Bintulu Muhammad Yakub Kari datai ba Dewan Suarah Bintulu laban ti deka ngulu pengerami nya tadi.
Penatai Salahuddin enggau bini iya dikelaluka Kaban Parlimen Sitak Bintulu Dato’ Seri Tiong King Sing, Kaban Dewan Negara Senator Pau Chiong Ung enggau bala pemesai bukai ti sama bela datai lalu diperindang enggau tanda singa sebedau dibai masuk ngagai Dewan Suarah Bintulu.
Pengudah nya, Salahuddin enggau bini iya dibai makai ba mija khas ti udah disediaka begulai enggau bala mensia mayuh mega ti sama bela datai ngulu pengerami nya tadi.
Ba pengerami nya, bala pemesai begulai enggau mensia mayuh ti sama bela datai ngulu pengerami nya mega diperindangka enggau mayuh bengkah tanda enggau main asal ari mayuh bengkah pupu raban bansa ti nguan menua tu.
Pia mega, mayuh bengkah gerempung tanda singa ti bisi ba pelilih menua tu mega sama bela mantaikan pengelandik sida betanda singa ti endang iya sebengkah ari tanda asal Raban Bansa Cina dikena mantaika pengaga ati kelebih agi rambau Taun Baru China.
Dulu ari tu, Salahuddin enggau bini iya bisi ngabang taun baru ngagai beberapa bengkah rumah pemesai ti bisi ba ditu lalu pengudah ti ngulu rumah tebuka ba Dewan Suarah, iya enggau bini iya ti disempulang bala pemesai menua ti bukai lalu neruska pengawa sida ti ngabang nya.