NADAI BERITA NGENYIT: (Ari kiba) Mawan, Masing enggau Abang Johari dipeda pansut ari Wisma Bapa Malaysia pengudah penerang betambit pintu nya kemari.
KUCHING: Kepala Menteri Sarawak Pehin Sri Abdul Taib Mahmud ngulu penerang betambit pintu begulai enggau Menteri Dalam Menua, Datuk Seri Dr Ahmad Zahid Hamidi di Wisma Bapa Malaysia ditu, kemari.
Nitihka tusun program ke dikeluar Opis Menteri Dalam Menua (KDN) minggu dulu tu tadi, penerang betambit pintu nya diatur di Opis Kepala Menteri lalu bekaul enggau Pengawa Bepilih Besai Nengeri ke-11 tu ila.
Taja pia, seiku pemesai KDN ke datai ngerimbai pemberita madah, penemuai Zahid nya semina deka meri basa ngagai Taib lalu nadai sebarang aum pengarang berita deka diatur pengudah nya.
Seraban enda kurang ari 20 iku pemberita berengkah begempuru di Wisma Bapa Malaysia kenyau ari pukul 9 :30 pagi lalu enda dikemendar tama ngagai laman begunan sereta semina nganti ba penama aja.
Bela datai Sapit Kepala Menteri Datuk Patinggi Tan Sri Alfred Jabu, Presiden Parti Rakyat Sarawak (PRS) Tan Sri James Masing, Presiden Parti Demokratik Progresif Sarawak (SPDP) Tan Sri William Mawan, Presiden Parti Sa’ati Rakyat Sarawak (SUPP) Tan Sri Peter Chin enggau ketuai Polis Malaysia Tan Sri Khalid Abu Bakar.