Ari tiga iku nama ti diperambu nyadi Kepala Menteri baru, nadai seiku pan ngarika raban bansa Dayak
MIRI: Kepala Menteri, Pehin Sri Abdul Taib Mahmud patut berundingka seiku ketuai bansa Dayak nyilih iya nyadi Kepala Menteri Baru kelimpah ari tiga nama ti udah sebut iya sebedau tu.
Kaban Komiti Parti Keadilan Rakyat (PKR) Sarawak, Abun Sui, kemari madah, Sapit Kepala Menteri ke diatu, Datuk Patinggi Tan Sri Alfred Jabu Numpang meh chalun Dayak ke pemadu patut diberi awak nganti Taib.
“Pekara tu ngasuh kami berasai sinu sereta dikemelu laban dalam kandang beberapa hari ke udah, semina tiga nama aja ke diperambu nyadi Kepala Menteri tang nadai seiku pan ari raban bansa Dayak.Jabu patut diberi peluang nya laban iya lama udah gawa sereta liat ati nitihka Taib ngelama tu,” ku iya bejaku ba aum enggau pemberita kemari.
Tiga iku nama ke diperambu nyilih Taib ari pampang bumiputera Parti Pesaka Bumiputera Bersatu (PBB) iya nya Sapit Presiden II, Datuk Amar Abang Johari Tun Openg, Ketuai Mandal Presiden II, Datuk Amar Awang Tengah Ali Hasan enggau Ketuai publisiti, Tan Sri Datuk Amar Adenan Satem.
Ku Abun, PKR nemu mayuh ketuai bansa Dayak ke ngembuan pematut nyadi ketuai di menua tu baka presiden Parti Rakyat Sarawak (PRS), Tan Sri James Jemut Masing tauka presiden Parti Demokratik Progresif Sarawak (SPDP), Tan Sri William Mawan Ikom.
Ku iya, pangku pengawa nya enda patut diungkup ke raban ari PBB aja, tang mega dibuka ngagai sekeda komponen parti BN di menua tu.
“Rintai nama chalun nya mega patut mungkur raban ari parti komponen BN bukai, lebih agi Dayak,” ku Abun.
Berebak enggau nya, Kaban Parlimen Miri, Dr Michael Teo Yu Kheng madah, Kepala Menteri Baru tu patut orang ti dipebasaka semua rayat Sarawak sereta ngembuan kualiti ke tinggi nyadi ketuai.
“Kami enda ngira sapa ke nyadi Kepala Menteri baru, tang iya patut beresi sereta dipebasaka semua rayat Sarawak,” ku Teo.
Kena Hari Minggu nyin tadi, Taib udah mutus ati deka ngemaduka diri nyadi Kepala Menteri ujung bulan tu.