Anda di sini

Perintah menua deka majak ngemansangka menua pesisir: Nyalau

Advertisement

ENGKILILI: Perintah Menua deka majak ngemansangka menua pesisir baka nya mega ulu entigis di menua tu, pia ku Kaban Parlimen Lubok Antu Encik William Nyalau ak Badak.

Ku iya, mayuh bengkah program udah diperambu kena nentuka genap buah kandang menua pesisir enggau ulu entigis kena bungkur program pemansang nya.

“Perintah menua tetap liat ati ngemansangka semua kandang menua pesisir enggau ulu entigis di menua tu.

“Nya alali keruai perintah Barisan Nasional (BN) seruran chakah ngambika rayat di menua pesisir enggau ulu entigis ulih dikemansangka magang,” pia ku iya.

Iya bejaku munyi tu ba Pengerami Betemu enggau Rayat di Rumah Panjai Empading, Bunu, dalam Pelilih Mit Engkilili, ditu apin lama ke udah.

Bela bisi ngulu pengeami nya, Kaban Kunsil Nengeri (ADUN) Engkilili Dr Johnnical Engkilili.

Ku Nyalau, juluk nya ulih dijapai ba sitak nya enti semua rakyat terus begempung enggau perintah menua.

Ku iya, semua projek pemansang ke diperambu nya ukai semina nguntungka menua tang mega rayat.

Iya mega mesan semua peranak menua tu ke diau mendam di menua pesisir, terus nyukung perintah dibetuaika komponen parti BN Sarawak.

Ku iya, sukung ari rayat ngagai perintah BN beguna Sarawak beguna amat ngambika sida seruran ulih ngasaika penguntung ari projek pemansang ke benung dipejalaika diserata menua tu.

Kelimpah ari nya, Nyalau mega arapka peranak menua nya terus meri sukung ngagai perintah ngambika mayuh bengkah projek pemansang ti dipejalaika ba kandang menua nya ulih meri penguntung ngagai sida.

Advertisement