SEBENGKAH PENGAWA: Zahid (dua kiba) disempulang Wan Junaidi (kiba) nemuai ngagai Indu Opis Polis Kontingen Nengeri, Jalai Badruddin, ditu kemari.
KUCHING: Menteri Dalam Menua Datuk Seri Dr Ahmad Zahid Hamidi ngatur penemuai begulai enggau raban Polis Diraja Malaysia (PDRM) Sarawak di Indu Opis Polis Kontingen Sarawak ditu, lemai kemari.
Sebedau diberi penerang betambit pintu ba bilik aum IPK Sarawak, Zahid dulu meresa baris polis ke bela disempulang Sapit iya Datuk Wan Junaidi Tuanku Jaafar.
Bela datai Kepala Polis Menua Tan Sri Khalid Abu Bakar enggau Kepala Polis Sarawak Datuk Wira Muhammad Sabtu Osman.
Pengudah mendingka penerang nya, Zahid enggau Khalid ngejang ngagai Palan Aum Borneo Kuching (BCCK) bejadi pengerami ngintu hari pengada RELA ke-42.
Muakka pagi, Zahid nemuai meri basa ngagai Kepala Menteri Pehin Sri Abdul Taib Mahmud ba opis iya di Wisma Bapa Malaysia.
Bela nyambut penemuai Zahid di Wisma Bapa Malaysia sapit kepala menteri Datuk Patinggi Tan Sri Alfred Jabu, Presiden Parti Rakyat Sarawak (PRS) Tan Sri James Masing, Presiden Parti Demokratik Progresif Sarawak (SPDP) Tan Sri William Mawan, Presiden Parti Sa’ati Rakyat Sarawak Tan Sri Peter Chin enggau ketuai bukai.