Pengawa tu lebih agi dikemerat lebuh maya ngatur sesebengkah program ngambi tau nguntungka semua
ENGKILILI: Kaban Kunsil Nengeri (ADUN) Engkilili, Dr Johnnical Rayong Ngipa ngelalau mensia mayuh ngambika begempung belama lebih agi lebuh bejalaika sesebengkah atur pengawa tauka program.
Ku iya, kerejasama ari semua piak kelebih agi lebuh ke ngatur program beguna amat ngambika pulaika pemujur program nya.
“Perintah meransang semua pupu raban bansa di menua tu, begulai ngintu sesebengkah pengerami baka Hari Raya, Gawai Dayak enggau Taun Baru China.
“ Kami arap ulih ngenegapka kerejasama entara pupu raban bansa ti nguan menua tu lebih agi maya ngerami sesebengkah pengerami,” ku iya bejaku ba Pengerami Ngintu Taun Baru China 2014, ke diatur Gerempung Tuai Rumah Engkilili di Balai Raya Skim Skrang, ditu kena Hari Enam minggu nyin tadi.
Dr Rayong mega meransang bala ketuai raban bansa ngambika suah agi mantaika langgur penemu enggau pengingin peranak rumah panjai tauka kampung ke ari baruh pegai sida.
Ku iya, ketuai raban bansa patut ngembuan ulah nya enti deka meda rumah panjai tauka kampung sida ngasaika pemansang ari perintah belama.
Sama bisi ngulu pengerami nya, Kaban Parlimen Lubok Antu William Nyalau, Pemesai Penerang Lubok Antu Geoffery Baja, Pemantu Luar Kanan JASA Engkilili, Edwin Ancheh enggau bala ketuai raban bansa di Engkilili.