Pengelandik sereta penemu ti dikembuan sida nyadi pelasar dikena bejalaika atur pengawa pemansang
SRI AMAN: Ketuai raban bansa ba tikas nembiak redak patut ngembuan mayuh pengelandik ti tau nyadika pelasar kena bejalaika pengawa ba kandang menua sida.
Menteri Muda Betanam Betupi Moden Datuk Mong Dagang madah, ketuai ba tikas nembiak redak ulih besemekih nyungkak pemanah kualiti pengidup mensia mayuh ke ari baruh pegai sida.
“Sida ke dipilih nyadi tuai rumah tauka ketuai raban bansa patut bejalaika pengawa enggau manah sereta lurus ati ngambika tiap bengkah agenda pemansang perintah ulih dipejalaika enggau manah sereta nguntungka rayat,” ku iya.
Iya bejaku munyi tu lebuh bejadika Pengerami Ketuai Begulai Enggau Rayat ti diatur Komiti Pemansang enggau Pengelikun Genturung Pendiau (JKKK) Rumah Baha Biran, Kampung Luchong, Sri Aman ditu kemari.
Mong ke mega ADUN Bukit Begunan madah, bala ketuai raban bansa mega patut bekerejasama enggau rayat sereta besaumka genap bengkah penanggul seraya ngiga chara ke pemadu manah kena mutarka penanggul nya.
“Sida anang ngelalai sereta patut mutarka penanggul nya ngambika enda ngenataika penusah sereta nating diri empu enggau rayat,” ku iya.
Ku iya, tiap ketuai raban bansa patut ngembu an kaul ke manah enggau mayuh bengkah ejensi perintah ngambi mudah agi mutarka sebarang penanggul.
Sida mega patut ngena perengkaguna enggau bantu ti disediaka perintah memanah ngambi pulaika pemaik ngagai rayat.
Mong mega meri terima kasih ngagai Opis Kereja Raya sereta Opis Parit enggau Entali Ai (JPS) Pelilih Sri Aman ketegal udah nyaup iya ngelasi parit ba kandang menua Tanjung Bijat berengkah ari kandang menua Taba nyentuk ke Kampung Melayu Baru bedau lama ke udah, laban kandang menua nya balat endar kena ampuh bah ujung taun seiti nyin tadi.
Iya mega arap bala ejensi perintah seruran bejalaika pengawa sida sereta mantu mutarka penanggul ke ditapi rayat, kelebih agi bekaul enggau isu pemansang.
Beserimbai enggau pengerami nya, Mong nyerahka bantu ti benungkus RM10,000 ngagai JKKK Rumah Baha Biran lalu RM5,000 ngagai Biro Wanita rumah nya, lalu RM3,000 agi diberi ngagai JKKK Rumah Lungkong Awek, Lunchong.
Iya mega nyuaka chek projek mit pemansang menua pesisir (MRP) ungkup taun 2014 ke beungkus RM50,000 ngagai sekeda JKKK enggau Biro Indu ba kandang menua nya.
Sebedau nya, seiku tukang licha ari Opis Penerang Malaysia Pelilih Mit Sri Aman, Salleh Immun bisi meri licha ti dikumbai ‘Kenegaraan’.
Bela bisi ngulu pengerami nya, Pemesai ari Opis Hal Ehal Khas (JASA) Sarawak Parlimen Sri Aman Whelton Lumpoi, pengari Pemesai Opis Penerang Sri Aman Juing Ullie, pengari JPS Abdul Hafizd Abdullah, Penulung Direktor Opis Pengintu Pengelantang Pendiau Mensia Mayuh Bagi menua Sri Aman, Sharifah Ranimah Wan Hashim, Sekretari Datuk Mong empu, Howard Tambom enggau sekeda bala bukai.