NGENGGAM SEMENGAT: Pendiau jematan gantung SK Nanga Merit ke ngantika runtuh aja.
LIMBANG: Ninting hari maya nurun sekula, bala anak enggau rayat Sekolah Kebangsaan (SK) Nanga Merit semak ditu begenggam semengat maya ke nengah jematan gantung dia mai diri ke sekula.
Tu setegal, jematan pemanjai kira-kira lebih 10 meter nya udah lama, jai sereta beguyat tiap kali ditengah sida laban penuai jematan nyau lebih 10 taun.
“Kami nadai pilih bukai, semina jematan lama tu aja bisi dikena anak kami pulai mansang ngagai sekula ke SK Nanga Merit,” ku John 45, peranak di kandang endur dia.
Iya bejaku madahka pengirau ati jematan nya ukai semina dipengau rayat sekula, tang mega orang mayuh nyengkaum apai indai orang ke betubuh bisi ke nganjung anak sida ke sekula ninting hari.
John madahka, lantai jematan nya mayuh udah tanggal sereta repuk lalu ke ngirauka ati maya ke diatu nya jematan nya beguyat baka ti deka runtuh sebarang maya.
“Enti suba gaya jematan tu tinggi, diatu nya jematan udah sama paras enggau tanah.
“Kedua-dua tiang nadai lekat ba ba tanah,tang semina ngarapka kawat besi aja,”ku iya.
Seiku agi peranak dia, Caterine 30 taun mega nerangka jematan nya mega dikena sida berangkutka batu bata enggau pasir ke sekula.
Nundaku iya, ninting hari bala nembiak enggai enda pan ngena jematan nya lalu sida suah betapi enggau pekara ke tau nganu pengelikun sida maya pulai mansang ngagai sekula.
“Di jematan tu nadai lampu jalai, lantai pan belubang kiba kanan, nengah jematan tu enda sebaka ke besabung nyawa,” ku iya.
Nundaku iya, bisi peranak bebikika jematan nya enggau naka alah laban irauka pengelikun anak sida ke ninting hari nengah jematan nya.