BERASAI SINU: Menteri Tugas Khas enggau Penyanding Penemu di Opis Kepala Menteri, Tan Sri Adenan Satem merap Taib.
KUCHING: Presiden Parti Pesaka Bumiputera Bersatu (PBB) Pehin Sri Abdul Taib Mahmud udah netapka iya deka ngelengkaka penuduk nyadi Kepala Menteri Sarawak ujung bulan tu.
Berindik ari nya, lebuh dikerandau pemberita sekalika deka madahka sapa orang ke nganti penuduk iya ila, Taib ke dikearap madah kemari semina madahka iya deka mutarka pemerat bukai dulu sebedau mantaika nama pengganti iya ila.
“Beri aku awak dulu mutarka pemerat bukai. Aku betemu enggau gabenur dulu. Aku ngaga pengawa aku nitihka tusun,” ku Taib pengudah abis nyadi chairman Aum Barisan Nasional (BN) renggat menua di Indu Opis Parti Pesaka Bumiputera Bersatu (PBB) ditu, kemari.
Taib ke udah megai Perintah Menua 33 taun tu ke udah, bisi nyebut deka madahka sapa ke deka nganti iya sereta madahka hari bulan iya patut ngelengka pengawa iya lebuh nyadi chairman aum ke belabuh ari Hari Enam tu tadi.
Ari jaku Sekretari Besai PBB (BN) ti mega Menteri Muda Pengerai Mensia Mayuh, Datuk Dr Stephen Rundi sebedau nya, enti sema bisi pengawa bepilih mit deka diatur dalam timpuh ke semak tu, ku Dr Rundi: “Nyangka ba Balingian aja, iya nya kerusi alai Taib bediri enti sema iya ngambi penuduk nyadi Tuai Pemegai Menua, tang nitihka atur Opis Pengawa Bepilih (SPR),” ku iya.
Tuai Pemegai Menua kediatu, TYT Tun Datuk Patinggi Abang Muhammad Salahuddin, deka abis timpuh kena 28 Februari tu.
Sama bisi ngulu aum PBB nya kemari, ke-empat-empat presiden komponen parti BN nengeri, Parti Sa’ati Rayat Sarawak (SUPP), Tan Sri Peter Chin Fah Kui, Parti Rakyat Sarawak (PRS) Tan Sri Datuk Amar Dr James Jemut Masing enggau presiden Parti Demokratik Progresif Sarawak (SPDP), Tan Sri William Mawan Ikom, bala Kaban Kunsil Nengeri (ADUN) menua tu enggau Kaban Parlimen (MP) ari menua Sarawak.