SUKUNG ARI SEMUA: Taib (tiga kanan) nerima sukung ari raban ketuai BN Sarawak (ari kiba) – Soon Koh, Abang Johari, Jabu, Masing enggau Awang Tengah.
Seagi iya nguan nengeri tu, sebarang penemu tauka peneleba ke dikembuan iya tau dipedua
KUCHING: Presiden Parti Rakyat Sarawak (PRS) Tan Sri Dr James Masing pechaya pemutus Kepala Menteri (KM) ngelengka pangku pengawa enda meri pangka negatif ngagai nengeri Sarawak.
Ku iya, seagi Pehin Sri Abdul Taib Mahmud mengkang nguan nengeri tu pengudah ngetu ari pangku pengawa ke diatu, penemu sereta peneleba iya mengkang ulih dipinta.
“Aku enda ngasai pemutus nya deka meri pangka ke besai ngagai nengeri tu. Seagi Taib mengkang ditu lalu enda mindah ke bukai kitai ulih betanya penemu sereta peneleba ari iya.
“Taib tau nyadi penyanding penemu ngagai raban ketuai ke diatu kelebih agi ba atur merintah enggau ekonomi Nengeri Sarawak,’ku iya.
Masing mansutka jaku tu lebuh dikerandau kemari sebedau enggau ngulu Aum Besai Barisan Nasional (BN) ke diuluka Taib ba Indu Opis Parti Pesaka Bumiputera Bersatu (PBB) di Jalai Bako ditu, kemari.
Taib ke udah nyadi kepala menteri pengelama 33 taun mutuska diri deka ngelengka pangku pengawa ba awak ke semak maya Aum Besai PBB ke diatur Hari Enam tu tadi.
Taja pia, ba aum nya ke diatur pengelama 5 jam nya, Komiti Kereja Tinggi (MKT) PBB mulaika kuasa milih kepala menteri ke baru ngagai Taib.
Ngenang senentang pemutus MKT PBB, Masing netapka PRS deka meri sukung ngagai sapa aja ketuai ti dipilih Taib.
“PBB setuju meri iya (Taib) mandat besai nentuka sapa bagi ketuai ti deka nyadi kepala menteri nganti penuduk iya.
“Aku ngarika PRS deka meri sukung ngagai sapa aja ke deka dipilih Taib lalu aku pechaya raban ketuai enggau kaban dalam PRS ke bukai bela deka meri sukung,”ku iya.
Tiga nama disebut deka dipilih Taib nganti penuduk kepala menteri ke baru iya nya Datuk Amar Abang Johari Tun Abang Openg, Datuk Amar Awang Tengah Ali Hassan enggau Datuk Amar Adenan Satem.
Sida tiga bela datai ngulu aum Bela datai ngulu aum Tan Sri William Mawan, Dato Seri Wong Soon Koh, Datuk Patinggi Tan Sri Alfred Jabu sereta ketuai bukai.