KUCHING: Presiden Parti Progresif Demokratik Sarawak (SPDP), Tan Sri William Mawan Ikom ngarapka parti komponen Barisan Nasional (BN) di menua tu meruan begempung di baruh pegai Kepala Menteri (KM) baru ila.
Iya madah, sebarang penanggul ke nyadi dalam kaul BN di menua tu deka ngachau penuduk BN.
“Kami ba SPDP tetap ngarapka pengabis manah pilih Kepala Menteri ngiring ngembing menua tu.
“Mindah kuasa semina utai ke disambung aja ari pemisi polisi ke diatu tang chara kitai mutarka pekara nya, patut digaga enggau silik sereta bejejimat “Tang pelaba aku, kami ulih nyapai penyerakup nya laban penegap kami, ukai semina ngagai siti-siti parti aja, tang ke semua BN,” ku Mawan.
Iya madah munyi nya lebuh dikerandau ba atur pengawa Aum PBB di Indu Opis PBB Jalai Bako ditu, kemari.
Lebuh diasuh nimbal pangku pengawa Kepala Menteri deka dilengkaka Pehin Si Abdul Taib Mahmud, iya madah sebarang pemutus ke digaga Kepala Menteri, sida iya tetap nyukung.
“Kami ngembuan sistem lalu kami nemu orang ke dipilih iya orang ke chukup besedia sereta bepeneleba, lalu ngarapka tiap iku kitai deka meri sukung.
“Nadai sapa ke dipilih ulih ngaga pengawa iya enggau pengabis manah enti nadai disukung, nya alai berat endar pangku pengawa kepala menteri nya ila begunaka sukung,” ku iya.
Ba pekara ke sama mega, ba Ketuai nembiak PBB, ti mega nyadi Menteri Kereja Malaysia, Datuk Fadillah Yusuf madahka Taib udah negutka menu Sarawak nyadi menua ke deka terus maju manggai 2030.
Iya madah penegut nya nyadi batang pengawa Taib dalam kandang 33 taun nyadi Kepala Menteri beratika redak baru deka diau enggau lantang jemah ila.
“Aku ke nyadi Ketuai Nembiak PBB beterima kasih endar ke pengengkun ke udah digaga ulih Kepala Menteri.
“Iya udah negutka palan kelebih agi baka pemansang fizikal, pengerembai mensia lalu ke berat agi, mayuh endar ngangkatka nembiak menua tu,” ku Fadillah madah lebuh dikerandau ulih pemberita sepengudah abis Aum PBB di Indu Opis parti nya di Jalai Bako ditu, kemari.
Iya nandu baru, pengawa Taib ku iya neritka kaul entara pupu bansa di menua tu patut dipajakka redak baru kemaya hari tu.
“Nya pemujur iya lalu kami berasai sinu ati tang bebasaka pemutus iya ke lama udah diperambu iya. Ngelama tu, suah endar iya udah madah deka badu, tang kami seruran ngetanka iya.
“Diatu enda ulih dipajakka kami agi laban iya (Taib) udah nemu tu meh naka iya lalu nyerahka penuduk nya ngagai orang bukai.
Kami beterima kasih ngagai iya ke semua pengawa ke udah digaga iya ngemansangka menua tu,” ku iya lalu nambah, sebarang orang ke dipilih Taib ila, tetap disukung Pemuda PBB.