SIBU: Ketuai raban bansa ditu bebasaka pemutus Pehin Sri Abdul Taib Mahmud ke deka ngetu nyadi Kepala Menteri Sarawak.
Taja berita nya bisi ngenyinuka ati, tang sida nemu perambu ke deka ngetu nyadi ketuai perintah nya endang lama udah diperambu.
Nya kena nentuka menua Sarawak terus nyadi sebuah nengeri ke diuan mayuh bengkah pupu raban bansa terus maju, lantang sereta likun.
Lebuh dikerandau kemari, Kaunsilor Senaun Jaya madah, orang ke nganti iya (Taib) ulih tetapi pangku pengawa nyadi ketuai perintah ke baru.
“Pekara besilih ketuai perintah tu ukai pekara ke baru laban kitai udah nengah pekara tu tiga kali kenyau ari Kepala Menteri Sarawak ti keterubah, Tan Sri Stephen Kalong Ningkan.
“Rayat Sarawak patut nyukung kepala perintah ke baru ngambika pemansang ti udah diperambu ulih dikemujurka,” pia ku iya.
Ku iya, penganti Taib patut landik agi ngerembaika pemujur perintah Barisan Nasional (BN) di menua tu.
Berebak enggau nya, Tuai Rumah Lau Nyanggau mega sepenemu enggau Senaun ti bebasaka pemutus Taib ke deka ngetu nyadi Kepala Menteri.
Ku Lau, udah datai ba maya iya Sarawak begunaka seiku ketuai baru ti ngembuan gaya megai perintah nengah chara ke baru.
Ku iya, ngelama 33 taun Taib nyadi ketuai perintah, iya udah mayuh bejalaika pemansang di Sarawak nyengkaum muka Koridor Kuasa Tau Dikena Baru Sarawak (SCORE) enggau Hab Halal Tanjung Manis.
Ku iya, pemansang nya diperambu kena ngangkatka ekonomi menua Sarawak seraya nyungkak tikas pengidup rayat.
Kelimpah ari nya, penganti Taib mega patut terus nentuka semua rayat Sarawak diintu belama.
“Enda ngira sapa nyilih iya (Taib), kami tetap nyukung orang ke dipilih nyilih iya ila,” ku iya.