ULIH NYAUP MUTAR: Chin diapit Tan Sri Dr James Masing (kiba) enggau Datuk Amar Abang Johari pengudah atur pengawa nya ditu kemari.
KUCHING: Presiden Parti Sa’ati Rakyat Sarawak (SUPP) Tan Sri Peter Chin ngarap kepala menteri baru tu ila ulih nyaup mutarka penanggul ke ditapi parti nya.
“Ketetiga chalun kepala menteri ke baru dalam runding Pehin Sri Abdul Taib Mahmud sigi udah lama dikelala sereta ngembuan kaul enggau SUPP dalam serakup Barisan Nasional (BN) nengeri. Kepala menteri deka nyadi chairman BN.
“Aku pechaya sapa aja entara sida tiga, enti dipilih nyadi kepala menteri sigi nadai penanggul bekerejasama enggau SUPP.
“SUPP ulih berandau manah enggau kepala menteri ke baru lalu deka nerima jaku ajar ari iya ke alai kitai mega pechaya ketetiga chalun nya nemu pekara ke benung nyadi dalam parti,”ku iya.
Chin mansutka jaku tu lebuh dikerandau pemberita pengudah Aum Besai BN Sarawak ke diatur di Indu Opis PBB Jalai Bako ditu, kemari.
Aum sehari nya (kemari) meri awak ngagai Taib ngenataika pemutus iya ti deka ngelengka pangku pengawa ngagai semua raban ketuai dalam perintah BN nengeri.
Chin madah, Taib disadang deka ngelengka pangku pengawa ba ujung bulan Februari tu lalu nama ketuai ti deka nganti iya bedau ulih dipansut ketegal bisi prosedur ti patut dititih.
“Nitihka konstitusyen nengeri, Taib patut betemu enggau gabenor dulu lalu nyerahka nama ketuai ti deka nganti iya. Gabenor ngembuan kuasa ngangkatka kepala menteri ke baru lalu nya nitihka sukung Taib,”ku iya.
Ba kaul ke sama, sapit presiden SUPP Datuk Seri Richard Riot Jaem madah pemutus Taib ti deka ngelengka pangku pengawa patut dipebasa.
“Kenyau merintah nengeri Sarawak pengelama lebih 30 taun, mayuh pemansang udah dibai Taib.
“Pemutus iya patut dipebasa semua,” ku Riot.