Anda di sini

Anti Kepala Menteri mantaika nama pilih iya, ku Abg Johari

Advertisement

ANTI AJA: Abang Johari diapit bala media pengudah Aum BN nengeri ba Indu Opis PBB ditu, kemari.

KUCHING: Raban ketuai senior Parti Pesaka Bumiputera Bersatu (PBB) nadai penanggul bekerejasama lalu deka semampai begempung taja pan nama seiku ari sida enda dipilih nganti Kepala Menteri Pehin Sri Abdul Taib Mahmud.

Sapit Presiden PBB Datuk Amar Abang Johari Tun Openg madah, mandat udah diberi ngagai Taib ba aum kaunsil tinggi parti Hari Enam tu tadi.

Abang Johari dipinta ngenang pengudah nama iya diserangkum entara tiga nama bukai iya nya Tan Sri Adenan Satem enggau Datuk Amar Awang Tengah Ali Hasan.

“Anti Kepala Menteri mantaika nama pilih iya,”ku iya madah ngagai pemberita pengudah aum begulai enggau raban ketuai serakup Barisan Nasional (BN) ba Indu Opis PBB ditu, kemari.

Abang Johari ke mega Menteri Dagang Temuai madah ba aum nya, kepala menteri ngalalau tiap serakup BN nengeri ke diarika Parti Sa’ati Rakyat Sarawak (SUPP), Parti Rakyat Sarawak (PRS) sereta Parti Demokratik Progresif Sarawak (SPDP) ngenanka penyerakup ke udah lama ayan pengudah iya ngetu.

Ngenang pekara ke sama, Awang Tengah madah pakara ti patut dikemerat iya nya nentuka perambu pemansang ulih ngemujur juluk negeri nyapai tikas menua mansang.

Seraya ti ngakun aum sehari nya chukup spisil ketegal ti nyadi aum ke penudi sebedau Taib ngetu, iya madah pemutus nya patut dipebasa semua.

“Sebarang pemutus Pehin Sri sigi deka disukung,” ku iya ke bela gaga pengudah dirintai entara tiga nama ke disadang nganti Taib.

Ketuai Sekretari Politik Kepala Menteri Abdullah Saidol madah ketuai ke nganti Taib patut dipebasa lalu diberi kerejasama.

Ngakun Taib nyadi seiku ketuai ke semampai meri ajar ngagai semua dalam BN, sukung ke bansa nya deka nyamin agenda politik pemansang ti dipunka Taib ungkup rayat deka majak dipejalai.

“Mangku pengawa nyadi Ketuai Sekretari Politik iya ti ke penudi, aku gaga udah meri servis lalu mayuh udah belajar ari seiku ketuai ti ngembuan mayuh peneleba sereta patriotik.

“Pehin Sri semampai meri jaku peransang ke aku ngambika enda mudah lemi penemu, semampai nemu pekara ke nyadi lalu bagas gawa,” ku iya.

Taib mega ngelalau ngambika semampai ngemeratka pinta enggau peneka rayat lalu enda mudah dikeruga sebarang tuduh sengapa ari orang ke enda meretika pengawa kitai, tandu iya.

Advertisement