TERIMA KASIH BN: (Duduk) Masing begulai enggau Ugak (dua kiba), Wilson (tiga kanan) enggau Nyuak (dua kanan) begambar bebala mayuh enggau raban penerima MRP.
Tu ngambika sida ulih nerima geran Projek Mit Pemansang Menua Pesisir ari perintah
KAPIT: Peranak sitak Pelagus diansak nyukung chalun Barisan Nasional (BN) ngerampas penuduk nya maya Pengawa Bepilih Nengeri (PRN) ti deka datai.
Menteri Pemansang Tanah Tan Sri Datuk Amar James Jemut Masing madah, tu beguna amat ngambika peranak ba sitak Pelagus ulih nerima mayuh agi geran Projek Mit Pemansang Menua Pesisir (MRP).
Ku Masing, sitak Baleh ke dipegai iya, nerima geran MRP ari iya empu enggau Kaban Parlimen (MP) Hulu Rajang Wilson Ugak Kumbong.
“Kami duai ari BN. Semua pengari rayat BN nerima agih belanja RM1.5 juta ungkup MRP setaun. Ungkup peranak Baleh, kami bulih penguntung ari MRP kelimpah nerima agih belanja ari bajet MP,” ku Masing madah ba sebengkah pengerami nyuaka geran MRP, apin lama ke udah.
Tandu iya, ketegal Pelagus diarika pengari rayat ari Parti Pekereja Sarawak (SWP) Sapit Presiden George Lagong, ke udah menang penuduk nya ba pengawa bepilih taun 2011, sitak nya nadai nerima geran MRP ari perintah.
“Peranak napi pengerugi laban iya (George) nadai ulih mantu kita. Nadai ngawa, sehari tu kita rugi. Kita patut belajar ari pengilap nya. Nya alai, maya pengawa bepilih ila, kita enda tau enda ngundi chalun BN ngambika kita ulih nerima geran MRP baka peranak ari Baleh,” ku Masing ke mega Kaban Kunsil Nengeri (ADUN) Baleh.
Ba pengerami nya, Masing madah geran sepenyampau RM167,000 ari bajet taun nyin kemari diagih ngagai 16 penerima ari sekula, rumah panjai enggau gerempung ukai dikuasa perintah (NGO) sitak Baleh.
Masing mega nyuaka RM100,000 ngagai 10 buah Komiti Pemansang enggau Pengelikun Genturung Pendiau (JKKK) ari sitak Pelagus.
Berebak enggau nya mega, Ugak nyuaka geran MRP ngagai tujuh buah JKKK ari sitak Hulu Rajang.
Sama bisi datai ba pengerami Sekretari Politik Kepala Menteri Sarawak, Wilson Nyabong, Kaban Komiti Tinggi PRS Datuk Kristoffer Nyuak, Penghulu Sallang Batang, Penghulu Ugak Esop, Penghulu Bunsu Gerinang enggau sida ke bukai.