KUCHING: Raban dalam Parti Pesaka Bumiputera Bersatu (PBB) deka bebendar ngeringka parti lalu ngenukuka PBB mengkang nyadi tiang penegap Barisan Nasional (BN) Sarawak, Ku Sekretari Besai Datuk Dr Stephen Rundi.
Ngenang pemutus Kepala Menteri Pehin Sri Abdul Taib Mahmud ti deka ngelengka pangku pengawa dalam timpuh nyentuk ngagai renggat DUN serak tu tamat 30 Jun 2016, Rundi madah PBB bekunda nentuka Nengeri Sarawak diintu manah lalu parti majak tegap sereta sedia napi sebarang keruga ari parti bukai.
“Bejaku ngenang pemutus Taib, baka ka munyi disebut mendam chairman kitai meri mandat ngagai kepala menteri milih bagi ketuai ti patut nguluka PBB, nyadi kepala menteri ke baru lalu nyadi chairman BN Sarawak.
“Atur ke dipejalai kitai sehari tu sigi atur ke suah dikena dalam PBB ke alai pemutus ti udah digaga nerima sukung ari semua kunsil tinggi enggau komiti kereja tinggi (MKT).
“Kepala menteri diberi kuasa milih ketuai ke nganti iya lalu nyadi ketuai kitai maya napi pengawa bepilih besai nengeri ke deka datai,” ku iya.
Rundi mansutka jaku tu lebuh dikerandau pemberita pengudah ngulu aum kunsil tinggi PBB ke diatur di Indu Opis PBB Jalai bako ditu, kemari.
Iya nambah, kitai nadai netapka sebarang maya Taib patut ngelengka pangku pengawa iya lalu semua nya dilempaika ba runding iya (Taib) empu.
“Aum sehari tu diadu baka ke suah, randau diri sebilik ke alai Taib baka ke apai, menyadi ngagai raban kami.
“Kitai deka nentuka PBB mengkang nyadi parti pemadu tegap di menua tu lalu baka ke udah dipandang ba pemutus pengawa bepilih ngelamatu, kitai nagit nyapai pemutus 100 peresin baru,” ku iya.