Anda di sini

Kerusi peruda ungkup Lee Chong Kwang ari JKM Sri Aman

Advertisement

SRI AMAN: Opis Pengintu Pengelantang Pendiau Mensia Mayuh (JKM) Pelilih Sri Aman udah meri sebuah kerusi peruda ngagai seiku orang ke bejual ai irup, Lee Chong Kwang ditu kemari.

Kwang, 69, ngidap penyakit kemi manis kenyau ari taun 2002 ti ngujungka kaki kiba iya ditetak raban perubat dalam taun 2005 suba.

Menteri Muda Pemansang Menua Pesisir enggau Pengawa Berumah, Datuk Francis Harden Hollis udah diberi basa nyuaka kerusi peruda nya ngagai Kwang ba kedai bejual ai irup iya empu.

Kwang meri terima kasih ngagai JKM ke mantu meri iya sebuah kerusi peruda ke alai iya nyamai tau mindah kin kitu ila.

“Aku meri terima kasih ketegal penyiru pengari rayat Barisan Nasional (BN) enggau ejensi perintah, laban udah meri kerusi peruda nya,” pia ku iya madah ngagai pemberita sepengudah nya, kemari.

Sama bisi maya nya, Sapit Direktor JKM Bagi Menua Sri Aman, Sharifah Ranimah Wan Assim, Penulung Pemesai Pengintu Pengelantang Pendiau Sri Aman, Micheal Lised, Pemantu Pengintu Pengelantang Pendiau, Tinggo Mangat, Sapit Chairman MDSA, Kaunsilor Sawing Sumar enggau sekeda bala ketuai raban bansa di Sri Aman.

Advertisement