SARIKEI: Seiku orang tuai ari sebuah rumah panjai di Sungai Alit, Nanga Latoh, Pakan ke dulu ari tu nyimbah rachun indu utai ba mua bini iya kena tinggang ukum RM300 tauka ukum jil sebulan olih Kot Majistret ditu kena Hari Empat tu tadi.
Majistret Stephanie Sherron Abbie ngelabuhka ukum udah Brandah Ajoi, 60 ngakun salah ba tuduh penyalah ke tau ngemedis mansa sereta ngujungka mata iya buta.
Penyalah nya tau diukum di baruh Seksyen 324 Kanun Keseksaan ke tau mai ukum jil naka tiga taun, ukum mata duit, sipat tauka antara dua ukum nya.
Nundaku kes ke dibacha pemesai prosekuting inspektor Anbarasu Gobi, orang ke dituduh ngereja penyalah tu kena pagi 20 Ogos udah iya (Brandah) besaut enggau bini iya bekaul jemari ke baru dibeli di Sarikei dua hari sebedau nya.
Brandah ngisi ukum nya.