KUCHING: Kaban Kunsil Nengeri Padungan, Wong King Wei madahka nadai berita ke pemadu baru sentang pengawa mulaika 300 bup kudus ke ditulis dalam Bahasa Malaysia ngagai Gerempung Bup Kudus Malaysia (BSM), kelimpah ari berita selebubu ngapa ke dipansutka ba portal berita online.
Ku iya, Pakatan Rakyat enggau DAP di Selangor ke lalu nadai ninga rita sentang pengawa Majlis Agama Islam Selangor (JAIS) ke patut mulaika Bup Kudus nya kena Hari Lima tu tadi.
“Aku mengkang alit ati, nama kebuah Jais lalu bedau mulaika Bup Kudus nya ngagai BSM,” pia ku Wong madah ngagai The Borneo Post ensanus.
Ketuai Nembiak DAP menua nya mega deka nemu sentang asil pemutus Menteri Besai Selangor Tan Sri Abdul Khalid Ibrahim ke nyidi kes Jais enggau Opis Menteri Dalam Nengeri ti ngerampas Bup Kudus nya.
Ku iya, perintah menua Selangor patut ngembuan penemu ke tegap sentang pekara nya laban Jais nya ukai ari baruh Jakim, tang ari baruh Majlis Agama Islam Selangor (MAIS) ari baruh pegai perintah menua ti betuaika Pakatan Rakyat (PR).
Wong mega madahka, JAIS udah ngerampas Bup Kudus nya, tang sida enda nemu ulah nya belaban enggau polisi PR.
Ku iya, perintah menua Selangor mega sepenemu madahka leka jaku ‘Allah’ nya tau dikena orang ukai Islam ngangauka Tuhan, tambah mega pekara nya udah dipesetuju dalam Sempekat 10 pekara enggau perintah besai.
Iya mega madahka, seagi-agi Bup Kudus dalam Bahasa Malaysia nya dichelak enggau tulis ‘Ungkup Orang Kristin’ ba lambar mua, Bup Kudus nya endar tau dirampas sereta tau dipesadung di serata menua Malaysia.
Berebak enggau nya, ketuai Sekreteri Gerempung Gerija di Sarawak, Ambrose Linang madahka BSM udah ngenukuka Bup Kudus nya bedau dipulaika ngagai Gerempung nya kena Hari lima tu tadi.