SRI AMAN: Tetiap opis perintah di nengeri tu diansak numbuhka ‘Emergency Response Team (ERT)’ ba endur gawa diri empu.
Menteri Muda Betanam Betupi (Pemansang enggau Pengawa Dagang) Sarawak, Datuk Mong Dagang madah, pengawa numbuhka ERT nya dikena nyikap diri napi penusah ngenyit ke tau nyadi sebarang maya ba endur gawa.
“Enti bisi ERT ba tetiap opis perintah nya ulih mantu piak Opis Bomba enggau Penyelamat meri bantu tumu sebedau piak bomba datai ba palan penyadi kelebih agi ke jauh ari Balai Bomba enggau Penyelamat,” ku iya.
Nya alai, enti bisi raban ke beempu tanggungpengawa dalam agensi sida ulih bejalaika atur ti patut seraya nganti penatai raban profesyenal Bomba.
Mong madah munyi nya ba pengerami nutup Bengkel ERT Hidro Batang Ai Power Station ba Balai Bomba enggau Penyelamat, bagi menua Sri Aman ditu, kemari.
Tandu Mong, penguntung masuk nyadi kaban ERT nadai serekat ngagai organisasyen endur gawa aja tang penemu ke dipelajar nengah latih tu ulih dikena maya betapi enggau sebarang penusah dalam raban bansa.
“Ambika chunto, maya bengkel tu, kita belajar ke chara ngena kereban pemadam api ke betul lalu enti kita pulai ke rumah panjai tauka genturung pendiau kita empu, kita ulih ngajar peranak chara ngena kereban madamka api nya enggau betul,” ku iya.
Berebak enggau nya mega, Mong ngansak tetiap Komiti Pemansang enggau Pengelikun Genturung Pendiau (JKKK) di rumah panjai, genturung pendiau sereta palan pengentap pendiau numbuhkan ERT tu.
“Aku pechaya, enti rumah panjai, genturung pendiau sereta palan pengentap pendiau numbuhkan ERT tu nya ulih ngurangka kes angus nyadi ba nengeri tu,” ku iya.
Bisi datai ba pengerami nya, Penguasa Kanan Bomba I, Yusri Mohd Yusuf, Pemesai Tadbir Sosial ba Opis Residen Sri Aman, Zaidi Sarkawi, Injinir Operasyen Hidro Batang Ai, Mohd Ardzuan, Penguasa Bomba Zon 3 Sri Aman, Azhar Mohamad sereta Ketuai Bengkel ERT, Stesyen Hidro Batang Ai, Fabian Wilson Jana.
Bengkel ke diatur sepengelama tiga hari ke digulu 30 iku pengereja pengawa Hidro Batang Ai Power Station nya dikena ngadaka bala pesereta ke ngembuan pengelandik maya betapi enggau penusah ngenyit kelimpah kena nyedarka diri beempu tanggungpengawa enti bisi kes nyadi ba endur gawa.