Anda di sini

SIBP deka mungkur orang gawa ngatika diri ibur 2015

Advertisement

KUCHING: Skim Insurans Kudi Maya Gawa (SIBP) deka berengkah diungkupka ngagai orang ke gawa ngatika diri  ba taun 2015, Ku Menteri Sumber Manusia Datuk Seri Richard Riot Jaem.

Ku iya, perintah nengah PERKESO merambu deka ngelanjarka sekim nya ngagai orang gawa ngatika diri ngambika sida bela diintu lalu mutung duit ba PERKESO.

“Kitai bela nemu, ngelamatu sida ke gawa ngatika diri enda diintu PERKESO lalu nengah kebuah nya kitai merambu sekim tu dilanjarka ngagai raban sida  tu.

“Berindik enggau nya, sekim insuran ke disedia PERKESO tu disadang ulih mungkur raban orang gawa ngatika diri manggai ba taun 2015,’ku iya.

Iya mansutka jaku tu ba siti aum pengarang berita pengudah ngulu pengawa nyuaka chek Faedah PERKESO di Indu Opis PERKESO ditu, kemari.

Riot mega madah Perkeso nengah kerejasama enggau Opis Pengerai deka nyendiaka Aum  Panel  Doktor Khas di Miri enggau Sibu ngambika ulih meri pemaik ngagai raban orang ke begunaka serbis ba kededua pelilih menua nya.

Ku iya, ngelamatu, semua orang gawa ke diintu PERKESO di serata nengeri enggai enda nuju ngagai Sepital Besai Sarawak (SGH) maya begunaka servis Aum  Panel  Doktor Khas ke bekaul enggau peminta  ari PERKESO.

“Dua palan tu deka berengkah meri servis kena 1 March tu lalu tau ngurangka belanja raban orang gawa ke datai tauka besemak enggau Sibu sereta Miri, “ ku iya nandu.

Entara sekeda penyakit ke suah nuntung orang gawa lalu diintu Sekim PERKESO iya nya sakit bengih , sindrom lubang kapal, pedis pegu enggau sakit ketegal suah ninga bunyi inggar.

Nitihka rikut PERKESO, sepemanjai timpuh 2012 ngagai 2014 mandangka 247 pinta servis penyakit udah dikenatai di serata Sarawak ke alai ari penyampau nya, 37 kes di Sibu enggau 64 kes di Miri.

Naka ke diatu, urung 1.05 juta orang gawa diintu nengah Skim Insurans Kudi Maya Gawa di Sarawak.

Putung ari pengaji ungkup sekim nya ditetap ba ikas 1.25 peresin ari penyampau gaji bulan bepanggai ba gaji pemadu besai RM3,000.

Pengaji ke enda mutung gaji orang gawa nengah sekim tu tau dipechara ba kot lalu enti ditemu salah tau diukum enda lebih RM10,000 tauka 2 taun jil tauka kededua.

Advertisement