KUCHING: Pertubuhan Belia Kebangsaan Sarawak (SABERKAS) deka chakah ngelatih rebak baru ngemeranka ulah deka mantu raban bansa, enda ngira pupu bansa ti tusah sereta begunaka bantu.
Presiden SABERKAS, Datuk Amar Abang Johari Tun Openg madah, ari nya semua raban bansa ulih bekerejasama senipak enggau juluk 1Malaysia, ke endang lama udah dikemeranka Sarawak.
Iya madahka Sarawak Hun Nam Siang Tng, Kuching ulih nyadika chunto rebak baru kelebih agi kaban SABERKAS.
Rebak baru patut dilatih dalam semua pekara nyengkaum mantu raban bansa ti begunaka bantu ngambika ulih nganti kami ti lama, ku iya.
“Kitai enda tau enda mantu orang ti kurang penatai pemisi, bisi penyelai pendiau sereta orang tuai ke patut dibantu enda ngira bansa, ambika chunto baka Sarawak Hun Nam Siang Tng di Kuching ditu ti udah mantu raban bansa pengelama 30 taun.
“Sarawak Hun Nam Siang Tng ukai semina nyaga enggau mantu raban bansa China aja tang nyengkaum Iban, Bidayuh, Melayu sereta bansa ke bukai. Nya kebuah kami (perintah) gerah jari deka mantu palan tu laban sida mantu semua orang.
“Bepelasarka nya kami deka ngelatih rebak baru nyengkaum raban nembiak SABERKAS (ngemeranka ulah deka mantu) ngambika ngembuan tanggungpengawa ngagai raban bansa,” ku iya ti mega nyadi Menteri Pengawa Berumah madahka diri tiap kali pengerami Taun Baru China selalu nemuai ngagai palan nya.
Abang Johari dikerandau pengarang berita pengudah pengerami nyuaka perais enggau ampau ngagai 25 iku orang tuai ba Sarawak Hun Nam Siang Tng nyerumba Taun Baru China 2014, ti diatur SABERKAS ba palan nya kemari.
Nitihku iya, SABERKAS mega bisi atur deka numbuhka Kelab SABERKAS ba Institut Pelajar Tinggi.
“Diatu kami benung chakah numbuhka kelab SABERKAS ba universiti kitai,” ku Abang Johari ti mega nyadi Menteri Dagang Temuai.
Ba pengerami nya, iya ngarika perintah meri RM50,000 ungkup rumah tinggi baru Sarawak Hun Nam Siang Tng sereta RM50,000 diskaun ngagai elektrik rumah baru nya.
Berebak enggau nya iya madahka diri gaga ati laban raban bansa China mayuh udah nyadi kaban SABERKAS nambahka bansa bukai di nengeri tu.
“Penyampau raban bansa China nyadi kaban SABERKAS nambah enggau ngenyit, kami nerima timbal ti manah pengudah perlembagaan diubah, kelimpah ari numbuhka pampang baru ba kandang endur ti mayuh raban bansa nya enggau pengerejista online,” ku iya.
Nitihku iya, dua taun ke udah penyampau raban bansa China nyadi kaban SABERKAS nambah 2,000 iku lebih ti nyengkaum Sibu, Bintangor enggau Kuching.
Penyampau semua kaban SABERKAS naka kediatu lebih ari 130,000 iku serata nengeri.
Bisi datai ngagai pengerami nya kemari, Menteri Muda Perengka Guna Mensia Mayuh ti mega Mandal Presiden SABERKAS Nengeri Sarawak enggau Chairman Komiti Sosial enggau Pengintu Pengelantang SABERKAS Nengeri Sarawak Datuk Dr. Stephen Rundi Utom; Chairman Sawarak Hun Nam Siang Tng Dato Sri Tay Thian Siong enggau kaban SABERKAS ke bukai.