KUCHING: Sapit Presiden Parti Bersatu Rakyat Sarawak (SUPP) Datuk Seri Richard Riot Jaem (gambar)enda lantang ati pengudah iya enda dipadah senentang perambu parti ke deka begempung enggau Parti Progresif Demokratik Sarawak (SPDP).
Lambar mua surat kabar The Borneo Post kemari ngeripot dia Presiden SUPP Tan Sri Peter Chin sereta Sapit Presiden SPDP Datuk Seri Tiong King Sing bisi betemu enggau Menteri Dalam Menua Datuk Seri Ahmad Zahid Hamidi di Putarajaya.
Nitihka ripot, penemuai seduai ketegal ti deka ngumbuk Zahid ngambika enda nginsil pengerijister SUPP lalu merambu kededua parti nya begempung ke alai Tiong deka nyadi ketuai sayap China nguluka entiti baru.
“Nyadi orang lumur dua, Sapit Presiden SUPP aku patut dipadah senentang perambu ti deka begempung enggau SPDP. Aku semina nemu berita tu maya ke macha ‘The Borneo Post’ pagi tu tadi.
“Enggau terang aku madah ditu lalu minta pemberita mansutka ba surat kabar dia aku chukup ringat digaga iya (presiden) baka tu.
“Parti ukai diarika seiku orang, parti diarika semua kaban dalam parti lalu aku ke nyadi sapit presiden enda dipadah senentang pekara tu, pekara tu mega patut dikerandau dulu,’ku iya.
Riot mansutka jaku tu lebuh ditanya pemberita ba siti aum pengarang berita pengudah pengawa nyuaka cek ngagai penerima Faedah Perkeso Kuching ditu, kemari.
Riot ke mega Menteri Sumber Manusia madah enti amat berita ke diriput nya bisi nyadi, nya mandangka penuduk iya ke nyadi sapit presiden dalam parti enda dipebasa.
Ku iya, enti amat Chin enggau Tiong bisi betemu enggau menteri dalam menua, aku berasai sinu ngenang pekara ke nyadi dalam SUPP tu.
Ditanya sekalika iya deka betemu enggau Chin, Riot madahka diri enda kiruhka pekara nya.
“Enti presiden enda kiruh deka madahka aku senentang perambu nya, nadai kebuah aku deka kiruh betemu enggau iya.
“Aku deka ngeletakka pemutus tauka kuing diri enti pekara nya amat nyadi,’ku iya.