KUCHING: Bisi 31 iku orang ti udah dichirika nyadi kaunsilor Majlis Perbandaran Padawan (MPP) udah ngangkat sumpah megai tanggungpengawa ungkup timpuh dua taun tauka Sesi 2014-2016, ditu kemari (ensana).
Menteri Muda Datuk Dr. Jerip Susil madah, penyampau nya bisi nambah dibandingka enggau taun sebedau tu.
Iya madah, raban kaunsilor nya ukai semina kaban politik aja tang nyengkaum ari gerempung ukai dikuasa perintah (NGO).
“Sekali tu penyampau kaunsilor MPP bisi nambah iya nya ari 25 iku sebedau tu ngagai 31 iku (Sesi 2014-2016).
“Sida 31 iku kaunsilor nyengkaum ari NGO ti bisi empat iku, SUPP (12 iku), PBB (9 iku), SPDP (3 iku) enggau ari PRS bisi tiga iku. Bisi 15 ari sida nya (31 iku) orang ke baru lalu kebukai dichirika baru.
“Ke diatu semina penuduk sapit chairman agi puang. Nama orang ke patut udah dianjung ngagai kabinet nengeri ngambika diserenih, lalu nama orang ke mangku penuduk nya deka dipadahka pengudah aum kabinet ke dudi tu ila,” ku Dr. Jerip ti enggai ngenang silik pekara nya.
Iya mansutka pekara nya dalam aum pengarang berita Majlis Angkat Sumpah Ahli Majlis MPP Sesi 2014-2016 ti diatur ba Dewan Majlis MPP ditu, lemai ensana.
Sebedau tu, sapit chairman MPP dipangku Mohd Hashim Yap.
Pengerami angkat sumpah nya dikemataka Menteri Kunsil Kandang Menua enggau Pemansang Raban Bansa ti mega nyadi Menteri Wang Kedua, Dato Sri Wong Soon Koh.
Lo Khere Chiang orang keterubah ngangkat sumpah di mua Wong, ti nunjukka Lo dichirika baru nyadi Chairman MPP sereta ditangkanka sekeda Kaban Opis Kaunsil ke lama enggau baru, ke mega udah berengkah bejalaika tanggungpengawa 1 Januari 2014 tu tadi.
Kelimpah ari nya, dalam jaku pengelalu pengerami nya, Lo ngarapka MPP deka chakah agi bejalaika pengawa beduduk ari mayuh raban ke baru sereta bepeneleba.
Iya ngarapka semua kaunsilor MPP ulih bekerejasama sereta nadai bechiping maya bejalaika tanggungpengawa.
“Nengah Kaban Opis Kaunsil ke baru ti nyengkaum ari NGO sereta mayuh macham profesyenal, aku ngarapka kitai semua ulih meri Input Positif sereta penemu tajam dikena meri servis ngagai raban bansa ke diau ba kandang endur ti dikuasa MPP.
“Aku ngarapka semua ti dichiri ulih sama enggau aku nyadi seiti tim gawa ke raban bansa di MPP, tambah mega kediatu kandang MPP mayuh udah maju, lalu peminta enggau guna rayat mega majak mayuh,” ku iya seraya beterima kasih ngagai perintah nengeri ti arap sereta nyirika iya baru nyadi chairman.
Pengerami nya mega bisi digulu Sekretari Mendam Opis Menteri Kandang Menua enggau Pemansang Raban Bansa Datuk Penguang Manggil.