KUCHING: Perintah Sarawak nengah Opis Menteri Dagang Temuai bekerejasama enggau Malaysia Airport Berhad (MAB) deka ngatur aum antarabansa bekaul enggau ‘Routes Asia’ (Pejalai Bilun Asia), di Palan Aum Borneo Kuching (BCCK) kena 9-11 March tu ila.
Menteri Pengawa Dagang Temuai Datuk Amar Abang Johari Tun Openg madah aum besai tu ila deka baum bekaul enggau sektor penerebai bilun sereta piak ke megai tanggungpengawa nyaga Padang Bilun di Asia.
“Aum ‘Routes Asia’ deka berandauka pasal industri penerebai bilun, ke digulu lebih 100 raban industri ari serata menua Asia.
“Kelimpah ari nya, dalam aum tu mega deka berandau ngiga pejalai tauka penerebai baru bilun enggau menua baru ke patut alai bilun terebai,” ku Abang Johari.
Iya madah munyi nya bejaku ba aum media, ‘Routes Asia Forum 2014’ di sebuah hotel antarabasa ditu, ensana.
Tandu iya, dalam industri penerebai bilun ngelama tu, mayuh udah berubah nyengkaum kompeni bilun sereta lanskap penerebai bilun.
Diatu ku iya, diperatika mayuh bilun besai, bilun tambang murah nyengkaum bilun ke disuwa.
“Nya alai, beguna amat aum tu diatur bejuraika initiatif ke patut dikena ba industri penerebai bilun.
“Ambika chunto, baka di Sarawak, perintah ngemeratka industri dagang temuai tang kitai napi penanggul kurang penerebai bilun kitu,” ku iya.
Nya alai, ku Abang Johari, aum besai tu ila, deka meri peneleba ngagai eksekutif kompeni bilun, meda pemanah sitak menua tu, lalu meri penguntung ngagai pengawa dagang temuai ti ulih dikemansang jauh agi.
Kelimpah ari nya, iya madah peluang aum besai tu mega deka beratika pemansang makit di Asia dalam sektor dagang temuai kelebih agi dalam sengkaum Asia Pasifik, ASEAN nyengkaum Korea, Jipun enggau China.
“Enti kitai nyebut Asia, India pan sebagi ari Asia. Lalu enti digempung menua India, China, Korea enggau Jipun, makit dagang temuai sigi besai,” ku iya.
Abang Johari ngarapka timbal ari aum Routes Asia tu ila deka meri penguntung ngagai Sarawak, kelebih agi lebuh menua tu besedia nerima kimpin ‘Open Sky in ASEAN’ belabuh ari 2015.
Taun 2013, di Padang Bilun Antarabansa Kuching (KIA) nerima urung 4.85 juta penumpang ti ngujungka KIA ba penuduk ketiga pemadu mayuh nerima penatai penumpang kelimpah ari KLIA (47 juta) enggau Kota Kinabalu (6 juta).
Sama bisi ngulu pengawa nya Menteri Muda Pengawa Dagang Temuai Datuk Talib Zulpilip, Direktor Besai MAB Tan Sri Bashir Ahmad, Sekretari Mendam Opis Menteri Pengawa Dagang Temuai Datu Ik Pahon, enggau Menijer Besai (Makit) MAB, Mohamed Sallauddin Mat Sah.