Anda di sini

112 tuai rumah bedau nerima surat chiri mangku pengawa, ku Linus

Advertisement

SIBU: Bisi 112 iku tuai ru­mah ba Parlimen Sibu eng­gau Lanang ke udah tembu timpuh gawa kena bulan Julai enggau Ogos taun seiti suba empai nerima surat dichirika baru nyentuk ke sehari tu.

Chairman Gerempung Tuai Rumah Sibu (PTRS) Tuai Rumah Linus Meling madah, iya pechaya penyampau nya nyangka mayuh agi ari 359 iku tuai rumah ba Sibu eng­gau Lanang ke udah tembu timpuh gawa ba pengelama empat taun.

“Ari 112 iku tuai rumah tu, 43 iku ari Parlimen Sibu enggau 69 iku ari Parlimen Lanang.

“Sepenyampau 18 iku ari sida udah tembu timpuh kena 31 Julai 2003 enggau 93 iku tembu timpuh kena 31 Ogos 2013.

“Berindik ari nya, ger­empung kami minta opis ti bekaul lengkas meri surat chiri nyadi tuai rumah baru ngagai sida tu,” ku iya ma­dah ngagai Utusan Borneo, kemari.

Ku Linus nerang, sida ke empai nerima surat tu mega enda nerima elawin RM800 ninting bulan.

Pekara tu, ku iya deka nekul bala tuai rumah bejalaika pen­gawa lebih agi sida ti endang bepanggai ba elawin nya.

“Kitai ngarapka pekara tu ulih diputar enggau lengkas nyengkaum bala tuai rumah ke bukai ba serata menua Sarawak,” ku tandu iya.

Linus ti mega kaban Opis Kunsil Pelilih Matu Daro ma­dah, tanggungpengawa nyadi tuai rumah beguna bendar ngagai rayat rumah panjai baka nyain pom baikka ba tuju sekula, setipikit pengada, surat tikah, surat sarak enggau mayuh pekara ke bukai agi.

“Sida mega nyadi ketuai ba pengawa ngatur adat ba rumah panjai,” ku iya.

Kelimpah ari nya, ku Linus, Menteri Wang II ti mega Menteri Kunsil Kandang Menua enggau Pemansang Raban Bansa Dato Sri Wong Soon Koh bisi nganjung surat nyukung nyiri baru semua 112 iku tuai rumah nya.

Surat nya dianjung kena bulan Mei, Jun enggau Ogos taun seiti suba ngagai Penga­rah Unit Pentadbiran Pejabat Ketua Menteri.

Advertisement