KUCHING: Sayap Indu Gerempung Graduet Dayak Sarawak (SDGA) nengah kerejasama Swinburne University of Technology (SUT) deka ngatur Aum Pengawa Dagang Indu 2014 kena 22 enggau 23 March ti deka datai.
Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim disadang bejadika aum nya ke diatur ba Auditorium Swinburne Sarawak.
Chairman pengatur, Caroline Sandra Giang madah aum nya ngena rambai jaku ‘Creating and Sustaining Women Entrepreneurship through the Art of Networking’ setipak endar enggau program ngangkatka pengawa dagang ba raban orang indu nengah arus Internet.
Iya madah program dua hari berungu nya ila deka meri penemu senentang pemerat pengawa dagang nengah arus internet ke deka dipekunsi raban profesyenal ti udah mujur.
“Kami bisi ngangauka presiden Gerempung Nasional Indu Dagang Malaysia (NAWEM), Sarojini Ruth Rajahser bekunsika penemu iya bakani indu dagang di Malaysia tu nyapai pemujur nengah arus Internet,” ku iya.
Iya bejaku munyi nya ba penemuai begulai enggau raban SDGA diketuaika Presidennya Dr Dusit Jaul maya nemuai ngagai Menteri Pengintu Pengelantang, Pekara Orang Indu enggau Pemansang Ruang Bilik Datuk Fatimah Abdullah ba opis menteri di Bangunan Baitulmakmur ditu, bedau lama ke udah.
Kelimpah ari nya, ku iya, aum tu mega sama bisi ngangauka seiku indu bansa Iban ke tebilang endar dalam pengawa ngelatih nembiak sereta ngereja pengawa pemansang ke orang indu di menua tu iya nya Florince Christy ari MAXCEL Institute Of Management Sarawak..
“Iya deka bekunsika peneleba diri dalam pekara dagang nengah arus Internet sereta mantu orang indu nyungkakka agi pengawa dagang sida,” ku iya.
Aum nya mega sama bisi ngangauka pengelicha bukai baka Rodney Lim,seiku chalun pHD enggau pensyarah ba SUT, Professor Madya Dr Madeline Berma ari Universiti Kebangsaan Malaysia (UKM).
Kelimpah ari gerempung ukai dikuasa perintah (NGO), ijinsi-ijinsi perintah ke bukai mega sama bisi dikangau ngulu aum tu baka MIDA, Bank SME, SEDC, Tekun, Unit Pengawa Dagang Bumiputera (Opis Kepala Menteri) enggau Biro Indu Sarawak.
“Kelimpah ari nya Datuk Fatimah ke nyadi penyanding penemu aum tu disadang ngelancharka pengawa nutup aum kena 23 March pukul 3.30 lemai,” ku iya.
Sebedau nya, Fatimah madah inisiatif SDGA enggau SUT Kampus Sarawak sigi manah lalu setipak enggau tuju ke besai opis menteri nya ngangkatka orang indu ba pengawa dagang.
“Diatu Sarawak benung narit mayuh agi raban orang indu nelebaka diri ba pengawa dagang. Aku nemu aum tu deka ngiri mayuh agi penemu ngagai raban orang indu ngemansangka diri ba dagang sida,” ku iya.
Yuran penyereta masuk aum tu, RM650 ke tau dibayar terus ngagai akaun Maybank SDGA ngena lumur akaun 511038081069.
Penerang ke silik, tau betanya ngagai lumur 082-258588 tauka email ngagai sarawakdga@gmail.com tauka betelefon ngagai Angela Sating (013-8054771), Hazelina Samuel (013-8026910) enggau Amelia Jimbun (019-8891758).