KUCHING: Meresa tikas pengerai untak ba sida ke deka nirika ruang bilik seiti ari chara ke engkeman kena ngurang kes nyamah ruang bilik, ku Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim.
Ku iya madah, nya alai, piak iya enda mantah berunding enggau Opis Menteri Pengerai Malaysia dikena ngenukuka chara pengambis engkeman enti deka bejalaika perambu nya, enti asai nya chara ke patut dikereja.
“Tu seiti perambu ke manah laban endang bisi laki bini ke ngembuan sejarah sakit untak tang ketegal pengerindu, pekara nya enda dikemeratka sida.
“Enti nya engkeman, pengawa meresa pengerai untak ulih dipejalaika baka kitai bejalaika peresa HIV ngagai sida ke deka jadi melaki bini, reti iya, semua pekara patut dipansik enggau silik,” ku iya madah ngagai pemberita pengudah ngabas pesakit di Wad Hematologi Sepital Besai Sarawak (HUS), bedau lama ke udah.
Maya dipinta nimbal riput surat kabar apin lama bekaul enggau penyalah berat munuh nembiak mit baruh umur 12 taun, Rohani enda ngenggaika nyangka pekara nya nyadi ketegal penanggul sakit untak ke bisi nyadi ba sida ruang bilik.
“Nitihka riput surat berita, bisi kes dikereja ruang bilik nya empu baka apai indai sereta bala kaban belayan ke bukai.
“Diatu, opis menteri nengah ijinsi bukai baka Opis Pengintu Pengelantang Raban Bansa (JKM) sereta Komiti Peranak enggau Pemansang Ruang Bilik Bansa (LPPKN) deka ngatur mayuh agi program baka kaunseling, kursus enggau forum bekaul enggau ruang bilik kena ngerapatka kaul diri sebilik ke dipeda majak keruk maya hari tu,” ku iya.
Iya mega ngelalau barang sapa ke ngembuan pengerindu masuk program ke diatur LPPKN tau ngelawa opis ke besemak, neresa websait http://www.lppkn.gov.my tauka betelefon ngagai lumur Nur 15999. — Bernama