MIRI: Seraban 20 iku ari kelab mutosikal Miri, Bintulu enggau Brunei udah besaup ngatur projek pengasih ti keterubah di bandaraya Miri taun tu.
‘Miri Riders Motor Group’ udah nengkebang projek tu nguluka gerup bukai.
Gerup bukai ke besaup bejalaika projek tu baka Aceland MG (Brunei), Miri Bikers Club, Miri Scrambler Group, LC Crew Sarawak, PSCC, Casado Lady Bikers MG, MOAC, 9DX Bintulu, SKPC, MYVI Borneo, Miri Style VIPstyle Community, Wild Wolf, Pekida Miri, Terios Cami Fan Club, Streets Auto Club, Viva Borneo, Myy Independent, Wings of Freedom enggau Alex Racing Team (Brunei).
Raban serakup tu diarika 200 iku penumpang enggau orang ke ngempu mutosikal ti gagit bendar ati deka bejalai bebala mayuh nuju Sungai Saeh Putih, Suai nyuaka bantu ngagai peranak rumah panjai 53 pintu nya ke udah dituntung penusah angus kena 15 Januari tu tadi.
Sida nyuaka bantu mata duit penyampau RM1,338 sereta kereban ngagai peranak rumah panjai ke udah dituntung penusah nya, barang bukai ke bisi diberi nyengkaum ai mineral, beras enggau sekeda utai bukai.
Sida mega deka mantu peranak rumah panjai nya ngaga dampa endur ngarar seraya nganti penyikap bukai begagaka rumah baru.
“Tu sebagi ari tanggungpengawa rama kami ngagai mensia mayuh ke dituntung penusah.
Sebedau mupok, raban sida tu begelumu ba Luak Esplanade, ningaka penerang ari penyanding penemu Miri Riders MG, Oma Kabol, bekaul enggau pengelikun.
Gandy ti ngarika presiden sida, Nelson Robert madahka diri berasai gaga endar ati meda sukung ari bala pengempu enggau penumpang mutosikal ngemujurka projek nya.
“Manah endar sambut lalu kami ngasaika diri bisi peransang, terima kasih ngagai semua ti sama enggau ngemujurka inisiatif tu,” ku iya.
Miri Riders MG udah ngerejister 44 iku kaban sereta chakah ba pengawa rama sereta lumba.
Program bukai ti deka dipejalaika sida nangkanka tu iya nya ‘2014 Miri Riders MG Family Day’ and KK Ride to Sabah’.