KUCHING: Semua kaunsilor enda tau enda ngemeratka komitmen ti tinggi sereta ngembuan pengelandik bejalaika tanggungpengawa ti udah diungkupka.
Menteri Kaunsil Kandang Menua enggau Pemansang Raban Bansa, Dato Sri Wong Soon Koh madah, nya dikena nyikap diri betapi enggau mayuh pemerat megai tanggungpengawa nyadi kaunsilor.
“Semua kaunselor ti dichiri patut nemu tanggungpengawa diri sereta bepengelandik pasal undang-undang Perintah Kaunsil Kandang Menua enggau polisi ke pemadu baru.
“Nyadi seiku kaunsilor ti bisi kaul enggau Opis Kaunsil Kandang Bandar Padawan (MPP), opis menteri kaunsil kandang menua, perintah nengeri sereta perintah besai, kitai patut nemu pekara ti enda tau enda dikereja tauka dipejalaika,” ku iya.
Wong ti mega Menteri Wang Kedua mansutka pekara nya lebuh bejaku ba ‘Majlis Angkat Sumpah Ahli Majlis MPP Sesi 2014-2016’ ti diatur ba Dewan Majlis, MPP ditu lemai kemari.
Dulu ari nya Wong ngemataka 31 iku orang ti udah dichiri nyadi Kaban Kaunsil MPP, besumpah bejalaika tanggunpengawa dalam timpuh dua taun.
Nandu baru, iya ngarapka kaunsilor tauka Kaban Kaunsil ukai semina berunding deka merambu sereta gawa dalam timpuh dua taun aja, tang patut berunding ngeluai ari nya.
Kelimpah ari meri servis sereta nadai bechiping ngereja pengawa ku iya, kaunsilor patut mantu perintah nempa raban bansa ti ngembuan penegap diri sereta talukka perintah.
“Enti kitai ngemeran sereta ngemeratka pekara nya, tentu kitai ulih ngemansangka MPP senipak enggau Opis Kaunsil Kandang Bandar ke bukai, ari nya MPP ulih nyadi Opis Kaunsil Kandang Bandar chunto,” ku iya.
Sama bisi ngulu atur pengawa nya, Menteri Muda Pengerai Mensia Mayuh Datuk Dr. Jerip Susil, Sekretari Mendam Opis Menteri Kaunsil Kandang Menua enggau Pemansang Raban Bansa Datuk Dr. Penguang Manggil sereta Chairman MPP, Lo Khere Chiang.