KUCHING: Seraban 3,000 iku nembiak dipelaba deka dibai ngerami Karnival Lumba enggau Main Bemuto Nembiak Sarawak 2014 ti deka diatur di laman Masja kena 8 Februari tu ila.
Karnival tu mega deka beratika sekeda pekit nyengkaum lumba ‘drag’ (mutosikal) 4T 150CC (body standard), 4T 110CC (tebuka), 2T 110CC (tebuka), 2T 150CC (body standard) enggau 2T tebuka KBS King.
Pekit bukai ke deka diatur, iya nya pengawa pemandang kerita enggau mutosikal ba kategori ‘cub standard’ enggau ekstrem, ‘scoot standard’ enggau ekstrem, ‘sound system’, ‘best lighting’ enggau ‘best lowered’.
Pekit ‘bikejam gymkhana’ mega sama deka diatur enggau sekeda kategori nyengkaum 125CC ke baruh (4T), 125CC ke atas (4T), scooter tebuka enggau ‘super motard’.
Ke dipelaba dikerinduka mensia mayuh ila, iya nya pekit ‘slow wheelie’ enggau ‘best wekang’.
Direktor Opis Nembiak, Lumba enggau Main (JBS) Sarawak Abdul Haris Ishak madah, naka ke diatu, urung 70 iku pelumba udah netapka diri ngambi bagi ba lumba ‘drag’.
“Penyerta agi dibuka datai ngagai hari Empat (sehari tu) tang taja pia, penyerta deka disekat naka 30 pelumba ke tiap kategori,” ku iya madah ba aum media beka enggau Karnival Lumba enggau Main Bemuto Nembiak Sarawak 2014 ditu, ensana.
Iya madah, karnival nya dikena ngangkatka kimpin ‘katakan tidak pada lumba haram’ ba nembiak.
“Kami ngasaika karnival baka tu palan ke pengabis manah endur nembiak ke bisi pengerindu dalam lumba enggau main bemuto mandangka pengelandik sida,” ku iya.
Kelimpah ari nya, iya madah, pengawa ngaga karnival tu mega ngajar nembiak nyadi orang ke tau nyadi ketuai sereta ngangkatka ekonomi nembiak.
“Kami betatika pengerindu sida. Program baka tu deka ngangkat, ngelatih sida iya nyadi ketuai lalu nambah pemisi sida iya dalam pengawa bejual bonet kerita,” ku iya.