SELEBUBU AJA: Asfia dikelingi pemberita ti deka ngulihka pengamat pengenda berita madahka Taib deka ngetu nyadi Kepala Menteri.
KUCHING: Speaker Dewan Undangan Nengeri Datuk Amar Mohamad Asfia Awang Nassar madah, berita ti ngenang Kepala Menteri (KM) Pehin Sri Abdul Taib Mahmud deka ngetu mangku pengawa mengkang berita selebubu ngapa lalu ukai dipejurai ba aum besai Parti Pesaka Bumiputera Bersatu (PBB) Hari Enam tu.
“Kenang ke nyebut Kepala Menteri deka ngetu mangku pengawa iya semina berita selebubu aja. Aku enda ulih ngenang panjai senentang pekara nya.
“Aum PBB kena Hari Enam tu baka aum ke suah diatur lalu enda bejuraika berita Taib ti dikejaku deka ngetu.
“Kitai deka bejuraika pekara ke patut dikerandau maya nya ila,” ku iya lebuh dikerandau pengudah ngulu pengawa nyuaka Pingat Perkhidmatan Setia Nengeri Sarawak di DUN baru ditu, kemari.
Tanda pingat nya disuaka Sapit Kepala Menteri Datuk Patinggi Tan Sri Alfred Jabu ti ngarika Taib.
Nyaut tanya senentang penganti Tuai Pemegai Menua (TYT), Asfia madahka iya bedau nerima surat ari perintah nengeri Sarawak.
Ku iya, nengah konstitusyen nengeri Sarawak atur ngangkatka TYT deka diadu Yang Dipertuan Agung pengudah nerima sukung ari kepala menteri.
“Lalu nitihka konstitusyen nya mega pengawa ngangkat kepala menteri dikuasa TYT ke alai iya milih seiku ketuai ti ngembuan sukung ari mensia mayuh ari dewan,’ku iya.
Asfia mega netapka isu TYT ke baru enda mega deka dipejurai ba aum besai PBB Hari Enam tu.
Ba kaul ke sama, Jabu lebuh dikerandau bela enggai ngenang senentang isu Taib ti dikejaku deka ngetu nyadi Kepala Menteri.
Iya ke enggai nyaut sebarang tanya semina minta raban pemberita nganti pengudah aum besai PBB.