KUCHING: Penapi ke berat ba perintah nengeri iya nya nyendiaka mayuh pengereja pengawa bepengelandik dikena ngisi peluang pengawa di tekat hidro Baleh enggau Baram, ti deka digaga sereta.
Pekara nya dipadahka Menteri Muda ba Opis Kepala Menteri (Pengatur Pemansang Pelajar Teknikal) Datu Len Talif Saleh ba sebengkah aum pengarang berita ba opis iya di Wisma Sumber Alam kemari.
Dikena napi pemerat nya iya madah, institut pelajar tinggi enggau industri patut bisi kerejasama ngemela ba pengawa nyendiaka latih ti senipak enggau peminta guna dalam kandang SCORE ti nyengkaum tekat hidro Baleh enggau Baram jemah ila.
“Kitai endang betapi enggau pemar nyendika pengeraja pengawa bepengelandik. Nya alai kitai patut bisi kerejasama entara institut pelajar tinggi enggau industri ngambika ulih ngelatih nembiak ti bepengelandik senipak enggau peminta guna.
“Nambahka nya kitai patut ngatur mayuh program ti ulih nerang sereta ngerembaika pasal latih ti senipak enggau peluang pengawa, ngambika raban nembiak ulih ngerebut peluang ke bisi disediaka taun ke deka datai.
“Nya alai nembiak patut nguna peluang ti bisi disediaka perintah” ku iya.
Len mansutka pekara nya lebuh ditanya pengarang berita sekalika pemutus perintah nengeri ti deka ngaga tekat ai Baleh enggau Baram sereta meri pangka tauka pemerat ba pengawa nyendiaka pengereja pengawa bepegelandik.
Dalam surat berita kemari Kepala Menteri madahka perintah nengeri udah mutus deka ngaga tekat ai Baleh enggau Baram sereta, ukai bererenggat baka ti diperambu sebedau tu.
Taib lebuh bejadika Kolej Universiti Teknologi Sarawak (UCTS) di Sibu ensanus madah, pemutus nengeri nya digaga dikena nyaga ati orang ti beranakka puku ba SCORE lebih agi ari menua Jipun, Korea enggau menua Timur.
“Nya alai dikena ngulihka juluk nya kitai patut ngembuan pemansang modal mensia ti bekualiti sereta bisi pengelandik teknikal.
“SCORE amat begunaka pengelandik teknikal lalu penumbuh UCTS nya amat senutuk enggau peminta guna nya.
Taib ngarapka UCTS ulih nempa mayuh agi raban profesyenal dalam bidang teknikal.
Kelimpah ari nya dalam aum pengarang berita ti sama, Len madah, perintah bebendar deka nyendiaka mayuh peluang pengawa di nengeri tu ngambika peranak Sarawak ti gawa di menua tasik sereta di Semenajung Malaysia tau pulai sereta gawa di nengeri diri.
“Kitai patut nyendia sereta nempa peluang pengawa di nengeri tu ngambika peranak Sarawak ti gawa di Semenanjung Malaysia, Singapore, Dubai enggau mayuh menua bukai ulih pulai gawa di nengeri diri sereta ngemeranka peneleba ke diulih ari menua tasik,” ku Len.