Anda di sini

SCATF 2014 dipelaba matak 35,000 penyereta

Advertisement

AMBI PELUANG: Len (dua kanan) dalam aum pengarang berita minta raban nembiak nengeri tu nguna SCAT Fair 2014 endur ngiga peluang nyambung belajar sereta gawa. — Gambar Muhd Rais Sanusi

Atur pengawa ti bepalan di BCCK kena 15–16 March tu ila deka ngerembaika mayuh penerang

KUCHING: Dipelabaka enda kurang ari 35,000 iku mensia deka ngulu ‘Sarawak Career and Training Fair’ (SCATF) 2014 ti deka diatur kena 15-16 March tu, bepalan di Palan Aum Besai Borneo Kuching (BCCK).

Menteri Muda ba Opis Kepala Menteri (Promosyen Pelajar Teknikal), Datu Len Talif Saleh madah, nya bepelasarka timbal ti manah ari raban nembiak maya SCAT Fair 2013, ti nerima urung 20,000 iku mensia ngulu karnival nya.

Iya madah, SCAT Fair 2014 deka dipenyadika Kepala Menteri Pehin Sri Abdul Taib Mahmud.

“SCAT Fair 2014 dipelabaka ulih narit urung 35,000 iku mensia nyengkaum peranak ari kandang menua Samarahan, Serian enggau Sri Aman, kelimpah ari peranak menua Kuching empu.

“Taun tu kitai ngatur SCAT Fair sebedau pemutus peresa Sijil Pelajaran Malaysia (SPM) enggau Sijil Tinggi Pelajaran Malaysia (STPM) dibantaika, iya diatur kena 15-16 March di BCCK, berengkah pukul 9.00 pagi nyentuk 6.00 lemai sereta deka dipenyadika Kepala Menteri.

“Tuju program dikena ngerembaika penerang ngagai orang mayuh lebih agi raban nembiak ke deka nampung pelajar nemu pasal peluang belajar enggau bantu belanja ti bisi disediaka, sereta peluang gawa sida jemah ila,” ku iya ti mega chairman komiti SCAT Fair 2014 minta raban nembiak ngambi peluang ti disediaka nengah karnival nya.

Len ti mega Menteri Muda Rampa Menua mansutka pekara nya dalam aum pengarang berita ti diatur ba opis iya di Wisma Sumber Alam ditu, pagi kemari.

Nitihku iya, karnival nya dipejalaika Unit Pemansang Penyampau Pengawa, Opis Kepala Menteri sereta kerejasama Tabung Ekonomi Gagasan Anak Bumiputera Sarawak (TEGAS) enggau Yayasan Sarawak.

Bisi 220 palan pemandang dibuka ti nyengkaum 130 institut latih pengelandik, 70 kompeni ti nyendiaka peluang gawa, 10 ejensi nyendiaka bantu pelajar enggau 10 ejensi perintah ti bekaul enggau pemansang nembiak, pengawa dagang enggau ‘employability graduate’ ti benung ngiga pengawa.

“Pengatur karnival bisi ngagauka macham industri baka dalam bidang penerbai, ngemanahka bilun, injinir, maritim, ladang, kayu ramu, industri berat sereta automatif.

“Ejensi ti nyendiaka bantu belanja pelajar mega bisi muka kaunter ti nyengkaum Yayasan Sarawak, PTPTN, MARA, SHELL, PETRONAS, Opis Pengereja Pengawa Perintah (JPA) enggau Yayasan Peneraju sereta Yayasan Jeffery Cheah ti nyendiaka bantu ngagai nembiak China ti deka ngambi pelajar akaun ba Kolej Sunway Kuching,” ku iya ti nyadi Chairman TEGAS.

Bejaku baru iya madah, perengka pengangkut enda bebayar diungkup ngagai BCCK bisi disediaka E-Mart, Plaza Merdeka, pengetu bas Jalan Kulas enggau Spring Mall sereta Summer Mall, Kota Samarahan.

Orang mayuh ari Santubong ulih ngena van ti disediaka enggau enda bebayar, ku iya.

Maya tu ila, Sekim Latih 1Malaysia (SL1M) enggau TalentCorp mega bisi meri penerang pasal sekim latih enggau intership ti bisi dipejalaika kompeni besai.

Perbadanan Usahawan Nasional Berhad (PUNB) enggau Unit Peneraju Agenda Bumiputera (TERAJU) deka narit mayuh agi raban nembiak Bumiputera dalam pengawa dagang

Ku iya, TERAJU deka bekunsi pasal Skim Usahawan Permulaan Bumiputera (SUPERB) ngagai orang dagang biak di Sarawak, iya nya sebengkah sekim ti nyendiaka belanja sepenyampau RM100 juta ti dipenyadika Menteri Besai apin lama.

Sama bisi ngulu aum pengarang berita kemari, Senior Assistant Officer, Workforce Development Unit, Opis Kepala Menteri Awangku Merali; Direktor, Opis Pemansang Pengelandik Kandang Menua Sarawak, Opis Menteri Pengereja Pengawa Zaid Mat San enggau ke bukai.

Advertisement