KELAI PENATAI PENGABANG: Gramong (kiba) enggau Aaron (kanan) nachak merechun datai sida ba sebuah rumah ke bisi alai sida ngabang.
SIBU: Mensia mayuh dilalau enda mantai pekara ke tau nyima ati orang bukai ngambika ulih ngenegapka penyerakup bansa di nengeri tu, ku Sapit Menteri Pemansang Tanah, Datuk Gramong Juna.
Iya madahka mensia ke ari mayuh pupu raban bansa enda tau enda bebasaka pangan diri dikena negutka kaul ke rapit antara sida.
“Sebengkah chara dikena ngerapit kaul iya nya begulai ngintu pengerami enggau bansa bukai.
“Perintah meri kelala semua pengerami di menua tu,” ku iya bejaku maya Pengerami Taun Baru China(TBC) di beberapa buah rumah di Kanowit bedau lama ke udah.
Gramong disempulang bini iya Datin Catherine Gramong, MP Kanowit MP Datuk Aaron Ago Dagang enggau bini Datin Ping Bungan, ADUN Ngemah Alexander Vincent engau bini iya Susan Clement, Pemancha Spencer Kudang, Pemancha Chia Chau Fa enggau Ketuai Opis Pemadah Kanowit Wan Mohd Zuki Wan Ismail, Residen Sibu Sim Kok Kee enggau sekretari politik Kepala Menteri Maurice Giri.