Anda di sini

Pegai Kepala Menteri agi dikemeratka Sarawak

Advertisement

Iya ngemeratka pemansang industri nengeri tu, bepeneleba ba politik, kemaya nyurutka diri awak iya nentuKUCHING: Kepala Menteri Pehin Sri Abdul Taib Mahmud agi dikemeratka Sarawak lebih agi bepelasarka peneleba iya dalam pengawa politik pemansang di kandang SCORE, ‘Hab Halal’, Tekat hidro di menua tu enggau macham jalai pemansang bukai ke ulih nyungkak nengeri tu ngembuan pengeraja industri manggai taun 2030 ila.

Menteri Muda Pengawa Berumah ti mega  Menteri Muda Nembiak (Nengeri), Datuk Abdul Karim Rahman Hamzah madah, Sarawak udah ngasaika mayuh pemansang baik nya di kandang mengeri tauka di menua pesisir.

“Ambika chunto, peratika bakani sitak Samarahan udah mayuh berubah, Mukah, Tanjung Manis maya Taib nyadi Kepala Menteri kitai. Bedau agi kitai meda pemansang ke mit-mit.

“Lalu pia mega baka Bakun enggau Samalaju diatu, entara pemansang ke disadang kitai ke ulih ngangkatka Sarawak nyadi sebuah menua industri jemah ila. Taib meh orang ke udah mai mayuh pemansang ngagai menua sereta ati ke seruran enggau rayat” ku Abdul Karim madah maya dikerandau Utusan Borneo enggau The Borneo Post di opis iya ditu, di Wisma Perumahan, kemari.

Iya madah munyi nya lebuh nimbal tanya ari sekeda orang ke deka nemu kemaya Taib badu nyadi Kepala Menteri.

Ku iya, maya pengawa bepilih besai menua dua taun ke udah, ba siti atur pengawa ‘Sejiwa Senada’ di Serian, Menteri Besai kala madahka penggal tu penggal ke penudi Taib deka bediri sereta nyadi Kepala Menteri.

‘Entara maya nya enggau diatu, mayuh tanda ke udah dipeda, nyangka tengan penggal tu kini. Penggal tu dijangka abis timpuh dalam taun 2016. Nyangka dalam taun 2016 kini, awakka Kepala Menteri empu madah. Nyangka pagila, bulan baru tu ila?,” ku iya.

Nya alai, iya madah, enggau peneleba ke dikembuan Taib, iya agi dikemerat nyadi ‘apai’ ke ulih dikearap kitai lebih agi dalam politik pemansang, ukai ketegal kena ngiga pemisi diri empu tang ngemeratka pemansang menua Sarawak.

“Nyangka orang bukai enda setuju enggau penemu aku, tang enti orang madah, Kepala Menteri ngiga pengeraja diri, iya pan majak tuai, bakani ku iya ka ngena pengeraja nya deh enti umur majak nambah.

“Pelaba aku ba pengawa pemansang ke digaga Kepala Menteri penyakal pan besetuju enggau aku,” ku iya.

Taja pia, iya madah, bakani pan kitai agi ngasuh iya (Taib) nyadi Kepala Menteri, enti ulih dalam timpuh ke panjai agi, tang umur majak nambah.

“Aku gaga ati enti Kepala Menteri agi ulih ngiring kitai tang nya mih, umur nambah ukai ulih diketuka kitai.

“Taja pia, nadai jalai kitai ulih nagang umur ari majak nambah, penyendia ba orang ke patut ngambi endur iya ila pan patut diatur enggau  manah.

“Ke diatu, enti iya agi ulih megai menua, awakka dulu laban Taib agi ngemeratka pemansang nengeri tu. Beri awak ngagai iya madahka maya ngetu nyadi Kepala Menteri. Iya nemu agi ni maya ke patut lalu ngulurka ‘baton’ ngagai orang ke nganti iya.

“Kitai semua nemu, ati iya endang ke menua tu, enti iya badu nyadi Kepala Menteri, iya nemu agi nyendiaka orang ke deka nganti iya, terus ngereja tampai ke menua tu,” ku Abdul Karim seraya nambah enti sema orang ke nganti Taib nya ila ari parti Pesaka Bumiputera Bersatu (PBB).

Enti diperati, ku Abdul Karim, Pehin Sri endang orang ke nadai hari belelak sereta laban pengawa nyadi menteri udah dipangku iya ari umur 26 lalu dalam timpuh nya datai ke diatu, pengawa iya ke menua aja.

“Lebuh megai tanggungpengawa perintah, urung taun 70 suba, Taib semina gawa ke perintah, nadai hari sekali enggau sida sebilik. Ngasaika aku empu ke bisi ruang bilik pan aku nadai hari belelak enggau kami sebilik,” ku iya.

Kelimpah ari nya, iya madah, kena 8 enggau 9 Februari tu ila, Taib deka ngulu aum enggau bala kabinet, ADUN enggau Kaban Parlimen iya, tang maya tu ku Abdul Karim, nadai nyebut pekara ke deka dibantai iya.

“Semina ke ditemu aku, aum kami kena 8 Februari iya nya bekaul enggau ‘Majlis Kerja Tertinggi’ (MKT) komponen Barisan Nasional (BN), ke biasa digaga kami lalu 9 Februari nya, Taib deka betemu enggau bala MP enggau ADUN BN.

“Ba 9 Februari nya nyangka bisi jaku ke diberi iya ngagai bala pengari rayat (YB), aku pan enda nemu pekara ke deka dibantai iya (Taib),” ku iya.

Taja pia, iya madah aum 9 Februari nya pan nyangka deka bejuraika pekara bukai ke ditapi menua baka ke diatu, isu leka jaku ‘Allah’, isu nasional bekaul enggau pengawa bepilih mit, sereta aum senentang kaul entara Perintah Menua enggau Perintah Besai.

Ba pekara orang ke deka nganti Taib jemah ila, ku Abdul Karim, barang sapa ke dipilih Taib, kaban kabinet tetap nyukung orang ke dipilih Taib.

“Kitai sama nganti, lalu ngarapka enti maya nya ila Taib deka madah sapa orang ke nganti iya, ngarapka pengawa nya ila bejalai enggau manah,” ku iya.

Sebedau nya, Abdul Karim nyuaka bantu belanja ari perintah ngagai Serakup Pemberita Pelilih Menua Kuching (KDJA) ke baru udah diatur kena 24 Januari tu tadi.

Advertisement